Dei ban pynkylla ïa ka UKJAD (Appointment and Succession of Chiefs & Headmen) Act, 1959 : Bah Shallam

Ka KHNAM ka la pyndep ki kam ïada jaitbynriew, Bah Pyngrope

0

Shillong, K’ Lyngkot 28: U Kyrtong ka KHNAM napoh 6-Sohryngkham Constituency u Bah Joseph Pyngrope ha ka sngi baar u la leit ban thep kyrteng hapoh ka ophis Deputy Commissioner ka East Khasi Hills na ka bynta ban ïakhun ïa ka elekshon MDC ha ka 21 tarik u Rymphang mynta u snem.
Ha kane ka jingleit thep kyrteng la synranlang da u Working President u Bah Thomas Passah bad kiba haïing ha sem bad kiwei kiwei.
Haba kren bad ki lad pathai khubor hadien ba u la dep ban thep ïa ka kyrteng u Bah Pyngrope u la ong ba ka jingbym don shuh u MLA napoh ka KHNAM ban mynta u la ong bad mynta u la don ha ka VPP kane kam don eiei namar ka jingdon ne ka jingbym don ym leh ban ong, hynrei bad ban pyni ïa ki kam ba ka KHNAM ka la leh, kam dei shuh ban mih namar watla ka seng kam don ha ka shuki ne ba ka don ha madan ka la dep ban pyni ïa ki kam naduh mynshwa.
“Ha kine ki snem kiba la leit ka KHNAM ka la trei borbah ha kaba ka la leh shibun ki kam ki ban myntoi na ka bynta ka jaitbynriew bad lada ki don ki bym pat tip ne bym ithuh ïa ka KHNAM nga sngewbha ban ong ïa ki ba ki dei ban wad jingtip ka KHNAM ka dei kaei, ïa ka seng la jer la thoh bad la kha ruh na ka syngkai jong ka KSU bad kadei ruh ka Movement bad kam dei ka seng saiñ hima sima bad kane kam dei ka bor pyrkhat ban ong ba ka seng kam dei kaba pyrkhat ban tei ïa ka jaitbynriew bad lada ngi rem elekshon ruh ngin trei bad lada ngi jop elekshon ruh ngin dang trei khambha,” ong u Bah Pyngrope.
U Bah Pyngrope u la ong ruh ba lada ka seng ka rem kan mareh ha madan bad lada ka jop kan treilang ha madan bad ha ben. “Lada ngi jop ngim ong ba ngin trei tang ha ben hynrei ngin leh ki jingwad bniah kiba bun bad ngin sa jam shakhmat shuh shuh bad ki kam babha jong ngi,” u la ong.
Haba kylli halor ka jingsngewskhem ka jong u namar ha kane ka constituency dang don u MLA jong ka VPP u Bah Pyngrope u la ong, “Ka jingjop ka jingrem ka shong ha u ba najrong bad ka shong ha ka nongrim namar ka nongrim jong ka KHNAM kadei ban ïada, ban kyntiew bad ban pynneh pynsah bad lada kren ïa ka ktien ïada kadei kaba kit jingmut shibun namar ngi hap ban ïada ha ka kam khaïi bad ka ïew ka hat bad ka jingïada ïa ka riti dustur ka synshar shnong bad ïa ki riti dustur jong ka ri bad ka jaitbynriew kata kadei kaba ngi pyrkhat, hynrei ban ong ba ki paidbah kim pat sngewthuh ïa kata ka jingbym jied ïa ki nongmihkhmat ban pynjop ïa ki, kiba trei na ka bynta ka jaitbynriew kata ka shong ha ki, ngi pyni beit ïa ka nongrim ka jingïada namarba ha suiñ ngin ym lah ban leh eiei, baroh mynta ngi ïeng hapoh madan ban pyni ba ngi kwah ban ïada ïa ka khyndew ka shyiap ban pynskhem ïa ka, khnang ba hadien habud lada ngi shah beh na kane ka khyndew ka shyiap jong ngi shano ngin leit, lada u bar jylla u shah beh nangne u dang don ki shnong ban leit phai hynrei lada shah beh ma ngi shano ngin leit,” ong u Bah Pyngrope.
U la ong ruh ba ka thong jong ka KHNAM ka long ban pynneh pynsah ïa ka jaitbynriew bad ban pynskhem ïa ka nongrim jong ka khyndew ka shyiap ba dei ban longtrai baroh shyrta.
Ha kawei pat ka liang u kyrtong ka Khun Hynñiewtrep National Awakening Movement (KHNAM) na Laitumkhrah-Malki u Bah Peter Shallam ha ka sngi baar u la pynpaw ka jingdonkam na ka bynta ka Khasi Hills Autonomous District Council (KHADC) ban pynbeit ïa ka jingeh jong ka jingbym ïoh jaka puta bad ka jingduk hapdeng ki nongshong shnong ka thaiñ nongkyndong, nangta ka jingsniew dur ka sawdong sawkun bad ka jingpynbha, ban pynkylla thymmai bad khmih biang ïa ka United Khasi Jaiñtia Autonomous District (Appointment and Succession of Chiefs & Headmen) Act, 1959.
Haba kren sha ki lad pathai khubor hadien ba la dep thep kyrteng na ka bynta ban ïakhun ïa ka elekshon MDC ha ka 21 tarik u bnai Rymphang hapoh ka KHADC, u Bah Shallam u la ong, “Ngi donkam ban shimkhia bha ïa kane ka elekshon shapoh ka KHADC. Ngi donkam ban ïada ïa ki briew ha nongkyndong ha kaba ki dei kiba la shah ktah bha ha ka jingduk bad ka jingbym don ki jaka puta.”
Haba ong ba ka kam tih maw tih shyiap ka la ktah bha ïa ka sawdong sawkun u kyrtong ka KHNAM u la ong, “Namar kata lyngba ka KHADC, ngi dei ban pynim biang ïa ki wah ki um bad ban wanrah biang ïa ka ecosystem. Palat 749 tylli ki tyllong um kumba ngi tip ki la don hapdeng ki jingma. Namar kata ka bynta jong ka KHADC ka long kaba kongsan bha halor kane.”
U buh ruh ka jingkylli halor ka jingpulom jong ki executive committee kiba rim ha KHADC ban jubab ïa ki jingkylli ba la phah da ka home ministry halor ka Village Administration Bill (VAB), 2014.
“Ki rangbah shnong ki la treikam halor ka nongrim jong ki kyndon bapher bapher naba kam don ka kyndon kaba long kawei bad kane ka la ktah ïa ki rukom trei ki shnong ha ka synshar khaddar,” bynrap u Bah Shallam.
U Bah Shallam u la banjur ruh halor ka jingdonkam ban pynthymmai bad khmih biang ïa ka United Khasi Jaiñtia Autonomous District (Appointment and Succession of Chiefs & Headmen) Act, 1959 bad ong, “Kum ka nuksa ha Ri Bhoi, ki khlieh nongsynshar ki la shim kabu da kaba shim bun palat ka pisa ha kaba ïadei bad ka jingdie bad thied ïa ki jaka puta. Kane ka la ktah ïa ki paidbah, kiba thied jaka na ka bynta ban leh ïa ki kam rep kam riang. Namar kata ka dei ka por kaba donkam bha na ka bynta ka KHADC ban pynthymmai bad khmih bniah biang ïa ka Act of 1959.”

Leave A Reply

Your email address will not be published.