Buh thong u kyrtong ka HSPDP ban pynïoh noh ïa ki Hima Khasi la ki jong ki aiñ

By Mawphor Editor On Jan 29, 2025

Shillong, K’ Lyngkot 28: U kyrtong ka HSPDP na 12- Mawsynram Constituency u ban ïakhun ïa ka elekshon MDC u Bah Starfing Jove Langpen Pdahkaseij uba dei ruh kum uwei na ki nongtrei ha ki kam lad pathai khubor ha ka sngi baar u la leit ban thep kyrteng hapoh ka ophis Deputy Commissioner ka East Khasi Hills District.
Hadien ba la dep ban thep ïa ka kyrteng haba ïakren bad ki lad pathai khubor, u Bah Starfing ula ong ba ka nongrim jong ka HSPDP naduh ba la seng ha u snem 1968 ka long ban pynneh, ban ïada bad ban pynbha bad halor kine ki ktien phira, un leit ban pynsngewthuh ïa ki paidbah ka Mawsynram.
U la ong ba watla ula ïakhun teng ïa ka elekshon MLA hynrei kane ka dei pat ka sien kaba nyngkong ba un ïakhun ïa ka elekshon MDC naba ka ADC ka dei kaba khia thew bha shibun namar kadei kaba la pynneh ïa kiba la buh da u longshwa manshwa.
“Ka MDC elekshon ka dei kaba khia bha naba kadei kaba hap ban bud ïa ka riti dustur namar lyngba ka district council ngi pynbha pynneh ïa ki, ban pynneh ïa kaei kaei kaba u longshwa manshwa u la buh bad ban ïada lada ki don kino kino ki bor kiba na shabar kiba wan ban pynthud ïa kaei kaba ngi don bad ban pynbha lada donkam ban pynbha katkum ka jingkylla jong ka por, bad kane kadei ka thong jong ka HSPDP naduh ba la seng ïa ka ha u snem 1968 bad ka thong ka jong nga ka long ban ïaleh ïa kane ka elekshon ka long ban peit ba ki it ki Hima kiba don hapoh ka KHADC ba ki dei ban don noh ïa la ki jong ki aiñ, namar ngi tip ba ki 54 tylli ki Hima, na kine 22 tylli ki la don ïa la ki jong ki aiñ, 4 tylli ki dei kiba la dep ban mynjur da ka KHADC bad kiba la leit sha u Lat ban ïoh ka jingmynjur bad 28 tylli ki dei ki Hima kiba dang sah bad ki bym pat don la ki aiñ,” ong u kyrtong ka HSPDP.
Haba ïathuh pat ïa ki Hima kiba don hapoh ka Mawsynram constituency, u Bah Starfing u la ong, “Ki don 6 tylli ki Hima ki bym pat don la ka jong ka aiñ, kawei ka dei ka Nongshluit sirdarship, ka Sinai sirdarship, ka Synnei sirdarship, ka Mawsynram Syiemship bad ka Malai Sohmat Syiemship bad ka thong ka jong nga lada ki paidbah ka Constituency kin pynjop ïa nga kum u MDC ngan peit ba kine ki Hima ki dei ban don noh la ki jong ki aiñ namar lada ym don ki aiñ ka jingsynshar kan long ka bym biang bad kumta kum ki MDC dei ban shim khia ba dei ban pynthikna ba ki Hima ki dei ban don noh la ki jong ki aiñ.”
U la ong ruh ba ka kam MLA ka don la ka jong ka bynta katba ka kam MDC kadei kaba treikam hapoh ka 6th scheduled ka riti synshar ka ri ban ïada ïa ki dustur, ka khyndew ka shyiap bad kiwei kiwei.
Haba ong ba ka jingïoh ban pynlong aiñ ïa ka KHADC Social Custom of Social leanage Act, 2023 ka la long kaba donkam bha, hynrei kaba bakla pat ka long ba ka jingpyndonkam ïa ka ktien registration, watla ka UDP bad HSPDP ki la pynpaw ka jingpyrshah halor kane, hynrei ka seng NPP da ka jingïatreilang bad ka Congress ki la mynjur namar ki dei kiba ïabun paid.
“Kumta lada nga jop bad wan ha ka bor ngin pynkylla bad ban wanrah da ka amendment, namar ngim lah ban pynrung kyrteng ïa ki kur, namar kim dei ka kompeni, ka khyndew ka shyiap, ka dukan bad kiwei,” ong u Bah Starfing.