Ka jingkwah ïakhun ïa ka elekshon ka dei ba kwah ban shakri hok ïa ki paidbah: Bah Kris

Shillong, K’ Lyngkot 28: U Kyrtong shimet napoh ka 6 Sohryngkham Constituency u Bah Kris Kharsati ha ka sngi baar u la leit ban thep kyrteng hapoh ka ophis Deputy Commissioner hapdeng ka jingsynranlang kiba haïing ha sem bad kiwei ki nongkyrshan jong u na ka bynta ban ïakhun ïa ka elekshon MDC ka ban long ha ka 21 tarik u bnai Rymphang.
Hadien ba la dep ban thep ïa ka kyrteng haba kren sha ki lad pathai khubor u Bah Kharsati u la ong ba ka jingmih biang jong u ban ïakhun ïa kane ka elekshon watba la shah rem ha ka elekshon MLA napoh ka Mawryngkneng Constituency ka long ban shakri hok ïa ki paidbah.
“Ka jingthmu ka jong nga ban mih ïakhun biang ïa ka elekshon kadei namar nga don ka jingthmu ban trei na ka bynta jong u paidbah bad ba ki paidbah ruh ki dang don ka jingshaniah, dei na kane kadaw ba la pynlong ïa nga ban mih biang mynta sa shisien bad lada ki paidbah ki jied nga kwah ban trei hok na ka bynta ki paidbah,” u la ong.
Haba kylli halor ki mat kiba hakhmat duh ba dei ban leh hapoh ka District Council u Bah Kharsati u la ong, “Ka mat jong ka District Council kadei hi ban peit na ka bynta ka bha ka miat jong ka jaitbynriew bad ka khyndew ka shyiap ka jong ngi bad lada nga poi ha ka bor dei ban ïapynbeit noh ïa ki rukom thungkam thungjam namar la ïohi ba ka rukom thungkam ha KHADC kam long kaba shai bad nga kwah ban pynbeit ïa kane ka bynta khnang ba kan long ka jingmyntoi na ka bynta ki samla kiba wad kam wad jam,” u la ong.
Haba ïadei bad ka jingkylli halor ki aiñ jong ka KHADC, u Bah Kharsati u la pynpaw ba kumba ka long mynta kiba bun ki aiñ hapoh ka District Council ki la biang hynrei dang donkam pat ban pynbha bad ban thaw shuh shuh ki aiñ.
Haba ïadei bad ka jingwan phai noh jong u MDC u Bah Pynïaid Sing Syiem sha Nongthymmai bad ka jingdon u MLA ka VPP, u Bah Kharsati u la ong ba ka jingïakhun hi kan don watla hapoh Sohryngkham ym don shuh u MDC.
“Kumba ka long ba bun hi ki ong ba u Prah u don bha ka lyer, hynrei ym lah pat ban ong ba uta uba na kano kano ka party un lah ban jop beit, hynrei mynta ba ki paidbah ki la stad naba ka elekshon MLA ka ïapher bad ka MDC ruh ka ïapher bad mynta ba u paidbah u wanrah beit ïa ka jingkylla ha ka ban jied ïa ki nongmihkhmat, hynrei kam shong eh ha ka party hynrei ka shong eh ha u briew ba ki paidbah ki jied uba biang ban trei na ka bynta jong ki,” ong u Bah Kharsati.
Haba ong ba mynshwa u la ïakhun ïa ka elekshon napoh ka party UDP, bad mynta ka kynti pat kum u kyrtong shimet kadei ka mon jong ki paidbah bad ka kam elekshon kam shong eh ha ka party.
“Haba nga ïaid sharum shaneng kiba bun hi na ki paidbah ki la pynpaw ïa ka jingkwah bad ka mon ba mynta ka kynti nga dei ban ïakhun noh u kyrtong shimet bad kumta nga shim ïa ka rai jong ki paidbah ban ïakhun ïa kane ka elekshon.
Ha kaba ïadei bad ka jingkylli kaei ka shap kaba u kwah na ka bynta ban ïakhun ïa kane ka elekshon, u Bah Kharsati u la ong ba ki nongkyrshan jong u ki kwah ban ïakhun na ka shap Mawlynnai bad na ka liang jong u ruh u kwah kumba kwah ki nongkyrshan.