Dawa ki nongtrei Aganwadi ïa ka sorkar ban pynkynkiew kyrdan ïa ki nongtrei ba la pyndep Graduate

Shillong, Ïaïong 01: Ka kynhun ki nongtrei Anganwadi hak a sngi baar ki la dawa ïa ka Sorkar Jylla ban mynjur noh mardor ïa ka jingpynkiew kyrdan ïa ki nongtrei Aganwadi ba la pyndep ïa ka graudaute, thungkam pura noh ïa ki bad ban pynkiew ïa ka honorarium sha ka T.15,000 shibnai.
Halor kane ha ka shithi ba la phah sha u Myntri Rangbah ka Jylla Conrad K Sangma dangshen, ki nongtrei Anganwadi ki la ong ba ka Sorkar Meghalaya ka kubur ïa ka jingkongsan ki nongtrei Anganwadi haba pyntreikam ïa ki skhim ba kongsan ka Sorkar kum ka Maternal & Child Health Program, Supplementary Nutrition Program bad ka Early Childhood Education. Hynrei ha Meghalaya, ki nongtrei Anganwadi kiba la don ïa ki graduate degree bad ba la trei da ki phew snem, kim shym la ïoh ïa ka jingkyntiew kyrdan hapoh ka por ba dei, watla ki la pyndep lut ïa ki kyndon jingshakri ha ki kyrdan bapher bapher.
“Ngi, kumta, ngi dawa ban pyntreikam noh mardor ïa ka jingkyntiew kyrdan ba sahteng ïa ki nongtrei Anganwadi ba la pyndep graduate katkum ka memo ba 2 tarik Jylliew 2023,” ki la bynrap.
Haba pynpaw ba bun na ki nongtrei Anganwadi ha Meghalaya ki dang ïai bteng ban trei da ka jingsiew honorarium, watla ki pyntrei ïa ki skhim ba la pynwandur bha jong ka Sorkar kiba batai ïa ki kyndon treikam, ka shithi ka ong ba ka Contract Labour (Regulation and Obolition) Act, 1970, ka Industrial Dispute Act, 1947 bad kiwei kiwei ki Labour Laws ki kren ba ki nongtrei ba la trei khlem sangeh da ki snem hapoh ki skhim ka Sorkar ki dei ïa ka ban thungkam pura noh, ban ïoh ïa ka kam kaba shngaiñ, ka jingsiew kaba ïahap, ki jingmyntoi haba shongthait, bad kiwei kiwei.
“Kumta ngi kyntu ïa ka Sorkar Meghalaya ban thungkam pura noh ïa ki nongtrei Anganwadi katkum ka Meghalaya Service Rules, kaba ithuh ïa ka synniang ba ki ai na ka bynta ka bit ka biang ki paidbah,” ki la ïathuh.
Haba kdew ruh ïa ka nongrim kajuh ka jingsiew ïa kajuh ka kam ba la kdew ha ka Labour Laws, ka shithi ka ong ba ïa mynta, ki nongtrei Anganwadi ki ïoh ïa ka honorarium na ka bhah ka Jylla kaba long T.3000- bhah ka Sorkar Pdeng T.4500 shibnai, ka bym pat biang satia ban pyndap ïa ki jingdonkam bad ki jinglut jingsep.
Ki la pynpaw ba ha kiwei ki Jylla, ki nongtrei Anganwadi ki ïoh ïa ka honorarium kaba heh nalor kiwei kiwei pat ki jingmyntoi.
“Kumta, ngi dawa ban pynkiew noh ïa ka honorarium sha ka T15,000 shibnai, kaba long katkum ka National Standard bad ki jingai jingmut ka Sorkar,” ka la bynrap.