Shillong. Ïaïong 01: Ka Khasi Students Union (KSU) ha ka sngi baar ka la aiti ïa ki 10 tylli ki mat jingdawa ban pynthikna ïa ka jingïoh ki hok jong ki trai ri trai muluk ba kim dei ban shah ïaid lait haba ïadei bad ka thungkam thungjam ha North Eastern Indira Gandhi Regional Institute of Health and Medical Sciences (NEIGRIHMS).
Ha ka shithi ba la phah sha u Director ka NEIGRIHMS, u chairman ka KSU Employment Cell Reuben Najiar u la ong, “Ka Union ka kwah ban kyrpad ïa phi ba kin shim kam mardor ha kaba ïadei bad ka jingthungkam thungjam bad ba ki hok jong ki trai ri trai muluk kim dei ban duh ïa ki hok bad ban shim khia haba ïadei ba kam thung ïa ki nurse ha NEIGRIHMS.”
“Ka Union ka kyrpad ruh ban pynsangeh shwa shipor kane ka jingpynmih ïa ka advertisement ba mynta tat haduh ba la lah ban pynbeit ïa kane ka kam bad lada don kano kano ka jingbym sngap kan pynlong ïa ka seng ba kan pynlong ki jingïakhih,” u la maham.
Haba kyrpad ban shim kam halor ki 10 tylli ki point ba la dawa, ka KSU ka la ong ba wat ïa ka rta thep kam ruh dei ban kyntiew sha ka 35 snem ha ka jaka jong ka 30 snem na ka bynta ki reserved category.
“Halor ka jingïohi ha ka advertisement ka pyni ba ka rta thep kam na ka bynta ki ophisar nurse bad kiwei ki kam la pynduna sha ka rta kaba 30 snem bad ïa ka kam Pharmacist sha ka 27 snem. Ha ki snem ba la dep ka rta thep kam la buh ba kan dei 35 snem bad ka jingpynhiar kaba kynsan ïa ka rta sha ka 30 snem ka la ktah ïa ki kyrtong kiba kwah ban thep kam,” ong u Bah Najiar da kaba bynrap, “Ka jingpynkylla ïa ki Recruitment Rule na ka bynta ka rta thep kam sha ka 30 snem dei ban pyndam noh bad dei ban buh biang da ka kyndon kaba rim ha kaba ka rta thungkam ka dei 35 snem na ka bynta ki reserved category.”
Haba banjur ïa ka jingdonkam kaba 20:80 male female ratio na ka bynta ka kam nursing officer, u Bah Najiar u la ong la ong ba ka jingthung kam nursing officer ha ki por mynshwa ha ka snem 2023 ka la ïaid lyngba ka NORCET. Ha ka snem 2023 la ïohi, ba ki 194 ngut kiba thepkam la dep ban jied ha kaba 175 ngut ki dei ki shynrang bad tang 19 ngut ki dei ki nurse kynthei kiba la shah jied. Kine ki 175 ngut ki nurse shynrang ki la shah ieh bad kiba khlem shah jied ha kiwei ki jaka pule hynrei la shah thep ha NEIGRIHMS baroh namar ba ki jingpynïaid kam ka long kaba ym biang bad kaba ym ïohi jngai bad kaba khlem don ka male female ratio of 20:80.
“Ka jingthung kam nursing officer ha kane ka snem la leh da ka NORCET hynrei ka AIIMS ka don 20:80 male female ratio kaba la pynlong ïa ka ban ïoh ki nongtrei kiba bha. Kine ki male nurse ki dei khambun na Rajasthan kiba ym dei kiba la pyntbit ha ka kam sumar. Ki la don bun ki jingshah ujor ba la ïohpdiang da ka Union pyrshah ïa kine ki nurse shynrang kiba ym lah ban pyndep bha ïa ka kam bad kiba long ka jingma ruh ïa ki nongpang. Lada kiwei ki jaka pule ki lah ban don ïa ka 20:80 ratio, kaei pat kaba pynlong ïa ka NEIGRIHMS ban pynsangeh ïa kane,” u la bynrap.
Shuh shuh ka KSU ka la dawa ruh ban wengnoh ïa ki experience certificate tang na ki jaka sumar kiba don 50 jingthiah bad dei ban shim ïa ki experience certificate na ki jaka sumar ba la register bad ka jingthepkam ruh ka dei ban long lyngba ka offline mode (OMR), dei ban khmih bniah ruh ïa ka Roster register bad ka dei ruh ban long katkum ka bhah kam kaba la buh.
Ka KSU ka la dawa ruh ban pynduh noh ïa ka bhah OBC ha ka Group B & C ha Meghalaya naba kam don ka thup OBC list, bad ïa ka Scheduled Caste reservation ha ka Group B dei ban pynhiar sha ka 1% kumba la bhah ha ka Group C kaba dei ruh halor ka nongrim katkum ka jingbun paid, ïa ka bhah kam OBC kaba dei 27% ha ka Group B bad 5% ha ka Group C dei ban phai dien biang sha ka Scheduled Tribes ka jylla Meghalaya (Khasi/ Jaiñtia/ Garo) bad ka jingthep kam kaba mynshwa ruh ban khmih biang kaba dei ban ïaid katkum ki point ba la kdew, bynrap ka KSU.
