Dawa ka RBYF ban pynkloi ïaka Civil Sub-Division Patharkhmah bad ban ym bakla haka rukom pynbeit pud

Nongpoh, Nailar 26: Ki nongïalam ka RBYF Western Zone mynta ka sngi kila mih shakhmat ban dawa naka sorkar ban pynkloi ïaka Civil Sub Division kaba ki paidbah kila ap khmih lynti la slem bad ba ka sorkar kam dei ban bakla ha kane ka wat ba ar jong ka jingpynpynbeit pud ba kum ka seng kam kwah shuh iaka huri hura haka jingpynbeit pud.
Haba kren sha ki lad pathai khubor mynta ka sngi ki nongïalam ka RBYF Western ZoneZone ba kynthup ïa u Bah Active Pator President, bad u Bah Runningwell Syngkli Secretary kila ong ba kum ka seng ka buh ka jingdawa naka sorkar ba ka dei ban pynkloi ïaka Civil Sub Division ha Patharkhmah kaba la dei hok ban ioh bad ba ki paidbah ka thaiñ ki ap khmih lynti haduh mynta ka kan urlong naka bynta ban pynsuk bad ban pynjan ïaki paidbah ha ka ba ïadei bad ki ophis sorkar.
Kitei ki nongïalam kila pynpaw ruh ba kum ka seng ka dap da ka jingsngewkhia halor ka jingkuman ka sorkar ïaka jingdawa ban pynurlong noh ïaka Administrative Unit Patharkhmah sha ka Civil Sub Division kaba la dei hok ban ioh bad ban kyntiew kyrdan noh ïaka.
Haka juh ka por naka liang ka seng ka kyrpad ruh ïaka sorkar ba kam dei ban bakla ïaka kam pynbeit pud ha kane ka wat ba ar haki 6 tylli ki jaka kajia pud, hadien ba ki ar myntri rangbah ka jylla Meghalaya bad Assam kila pynbna ba yn sdang noh shen ban thaw ïaki Regional Committe naka bynta ka jingpynbeit pud bad ban sngap ïaka sur bad ka jingmynjur ki paidbah bad ban nym ïaid lait ïaki Syiem, ki nongsynshar shnong kiba tip khambha ïaki jaka puta katkum ki dulir bad ki kot ki sla.