Khliehriat ïaïong 24 : Ki dkhot jong ka Meghalaya People’s United Front East Jaiñtia Hills District kaba hapoh ka jingïalam u President, u bah Kyrshan Blah mynta ka sngi ki la leit ban jurip ïa ka surok Ladrymbai Bypass bad lap ba kane ka surok ka la julor bad sniew shaba palat, kumta ka seng ka dawa na ka tnat PWD ba ka dei ban shim khia ban maramot noh kham kloi ïa katei ka surok.
U bah Kyrshan, u la ong ba lada katei ka surok Ladrymbai Bypass ka bha kan ïarap ban tehlakam ruh wat ïa ka jingdheng kali ha ka surok national highway bad ba ki nongleit nongwan ruh kin nym ïakynduh jingeh than ha ka leit ka wan, ba ki kali kiba kit mar bam, ki kali rit bad ki kali kit nongpang ruh kin nym ïakynduh jingeh than bad kan kham pynsting ruh ïa ka jingïaid ki kali na ka surok national highway, ha kaba ïadei bad kane, na ka liang utei u nongïalam u la ong ba ka seng kan sa leit ban buh da ka jingthoh sha ka tnat ba dei peit bad lada ka tnat kam leh eiei ka seng kan sa leit ban rah ïa kane ka mat sha ki bor kiba kham shalor.
