Nongpoh, Jymmang 20: Namar ka jingjynjar ki paidbah ha ka leit ka wan na ka jingsniew ka surok ba la iehnoh jyndat da u Contractor, ka HYC Ri Bhoi Sepngi ka la dawa syndon da ka sorkar lyngba ka tnad PWD ba ka dei ban pyndep noh ïa ka surok na Mawskeithem sha Warmawsaw.
Kane ka jingmih ka HYC Ri Bhoi Sepngi ban kren ne pynpaw halor kane ka jingeh ki paidbah, ka dei halor ka nongrim ba bun ki paidbah katei ka thain ki la ïa ud bad bynniaw na ka jingsniew ka surok na Mawskeinthem sha Warmawsaw ba u Contractor ym pat lah ban pyndep haduh kine ki sngi ba ka la wan rah ka jingjynjar ha ka leit ka wan bad ka kit ka bah.
Kane ka surok ba la pynpaw da ka seng HYC Ri Bhoi Sepngi, ka dei ka surok PMGSY ba la mang na Patharkhmah sha Warmawsaw, hynrei kumba long haduh mynta u Contractor u dang pyndep tang na Patharkhmah sha Mawskeithem bad u la iehnoh pat khlem da pyndep na Mawskeithem sha Warmawsaw.
Haba ïa kren bad ki Nongthoh Khubor, u Publicity Secretary ka HYC, Ri Bhoi Sepngi, u John Makri, u la ong ba kane ka jingpynsahteng u Contractor khlem da pyndep ïa ka surok ka la buh jingeh shisha ïa ki paidbah ha ka leit ka wan bad bun na ki paidbah ki la ud la ïam ba ki la jynjar palat ha ka leit ka wan bad khamtam ha kane ka por lyiur ka surok ka la sniew sha ba palat.
U la ong ruh ki paidbah ki mad jingeh ym tang ba ki leit sumar ha Warmawsaw PHC bad lada don kiba pang jur ki hap ba wan shaduh sha CHC Patharkhmah bad tang na ka daw ka jingsniew ka surok ki la shem jingeh shisha ha ka leit ka wan ba kajinglong jingman ka surok ka la sniew sha ba palat.
Kane ka ktah ruh wat ha ka kit ka bah bad ban ïaid ki kali paidbah bad khamtam ki khynnah skul kiba ju pyndonkam ïa kane ka surok, ong une u nongïalam bad la jin ba ka sorkar ka la lah ban pyndep ïa kane ka surok ka la long ka jingkyrkhu ïa ki paidbah ha ka leit ka wan, u la bynrap.
Namarkata, ban suk ki paidbah ha ka leit ka wan bad ha ka kit ka bah, ka seng HYC Ri Bhoi Sepngi ka la dawa na ka sorkar lyngba ka tnad PWD ba ka dei ban pyndep noh ïa katei ka surok bad ka jinglah ban pyndep noh ïa katei ka surok ka long ka jingkyrkhu ïa ki paidbah katei ka thain ha ka leit ka wan kumba ki ju ong ba ka surok ka long u budlum jong ka ioh ka kot, u la bynrap shuh shuh.
