Shillong Jymmang 20: Ka All India Trinamool Congress (AITC) ka la buh jingkylli ïa u Myntri Rangbah ka Jylla u Conrad Kongkal Sangma, halor ka jingjot jong ki surok bad ka jingshong synjor jong ki jingkieng ha ka jingther jong u lapbah uba jur ha kane ka aiom lyiur.
Ka AITC ha ka sngi Thohdieng ka la kynthoh ruh ïa ka jingsahdien bad ka jingjot jong ki surok ha ka Constituency jong u James PK Sangma bad u Bah Nujorki Sungoh.
“Balei ki surok bad ki jingkieng ha Meghalaya ki jot bad ki synjor, Conrad,” la kynthoh ka AITC lyngba u kyrwoh ba la phah da ka IPAC.
“Kam dei shuh kaba dang thymmai ba ki surok ha Meghalaya kin khoh bad julor. Ka jingjot jong ki surok ka la buh jingeh ïa ki nongleit nongwan, ïa ki kali kiba kit ïa ki nongpang, ïa ki khynnah skul bad kiwei kiwei,” la kynthoh ka AITC.
Ka Trinamool Congress ka la kynthoh ruh halor ka jingjot rathai jong ka surok ha ka Constituency jong u MLA ka UDP u Bah Nujorki Sungoh kaba la ktah ïa ka leit ka wan jong ki paidbah ha ka leit ka wan bad ha ka rah ka rong bad ka jingbym biang ka surok ha ka Constituency jong u Myntri ka tnat ka Koit ka Khiah u James PK Sangma la i kumba ka jylla ka la don hapdeng ka jingshah dkhat noh na ka thaiñ.
Ha rilum Garo, dang khyndait sngi, ki nongshong shnong ki la hap ban shu kit da ka met ïa kawei ka longkmie kaba pang da kaba ïaid kjat 700 mitar tang ban leit rah sha ka jaka ai jingsumar. Ka jingktieh jong ka surok kat haduh ba ym long shuh ban ïaid kali ka la pynlong ïa kine ki nongshong shnong ban shu kit da ka met ïa ka nongpang namarba kim don lad shuh da kumwei pat, la kynnoh ka AITC.
Ha South Garo Hills, ka surok NH-62 ka la sniew haduh katta katta nalor ka jingkieng dieng kaba la 30 snem kam shym la treikam shuh mynta da ki snem. “Wat hapdeng ka jingud jingnam jong ki nongshong shong, ka Sorkar MDA ba la ïalam da u Myntri Rangbah u Conrad Sangma ka leh bym suidñiew ïa ka jingjot jong ka surok National Highway,” la kynnoh shuh shuh ka AITC.
“Ka surok Songsak-Mendipathar ba la shna lyngba ka ‘German Technology’ bad ka surok Damra-Bajengdoba ki la jot haduh katta katta,” la ong ka Seng.
“Ha Mindikgre, ka jingkieng dewbilat ba la shna lyngba ka skhim PMGSY, la lap ba ka la julor tang hapoh lai bnai ba ladep shna,” la ong ka AITC.
“Nalor ki surok, wat ka Inter State Bus Terminus kaba la pynlut pisa haduh T.48 klur kam shym la shan satia tang shu wan iuhkjat ka aiom lyiur hapoh ka jylla,” kynthoh shuh shuh ka AITC.
Haba kynthoh halor ka rukom trei torti ïa ki surok bad ïa ki jingkieng, ka AITC ka la ong, “ym lah satia ban buhrieh ïa ka jingtrei torti ïa ki surok bad ki jingkieng. Hato u Conrad Sangma u lah ban ai jubab balei wat hapdeng ba la mang pisa, ki jingtei hapoh ka jylla ki long haduh katne?
