Dap 100 snem ka jingbet ïa u symbai jingngeit Katholik ha ka shnong Iooksi

Jowai: Ka Balang Catholic shnong Iooksi kaba hapoh ka Parish Mowkyndeng Jowai Diocese, ka la rakhe pynkut ïa ka jingdap shispah snem ka jingwan ka Niam Katholik ha shnong Iooksi, kaba la ioh ïuhkjat da ka jingrung niam jong u Alexender Papeng ha ka 23 tarik Kylla lyngkot 1923, nangta bud sa kiwei de kum u Hercome Latam, u Limon Tangliang, kong Glara Manner bad katba nangïaid ki sngi bad ka por kiba rung Balang ki la nangbun nangbun.
Ka shnong Iooksi ka dei kawei na ki shnong kiba heh hapoh ka Elaka Raliang. Ki longiing ki don 977 tnum ïing bad na kine 222 iing ki dei ki longïing Katholik. Ha kane ka jingrakhe ïa ka jingdap shispah snem ka Balang Katholik ha shnong Iooksi, la wan sakhi lang da ki hajar ki paid riewngeit napoh ka Diocese Jowai, na ka Archdiocese Shillong ki paid riewngeit na ki kynhun Balang bapher bapher na ki shnong ba marjan bad na jngai.
Hashwa ban pynlong ïa ka jingkñia Mas Iukharist, u Most Rev. Ferdinand Dkhar DD, Bishop ka Jowai Diocese ha ryngkat ka jingdonlang ki Phadar, u la kyrkhu ïa u Motsahnam uba la tei ha phyllaw ka ïingmane “Assumtion of Mother Mary Catholik Church Iooksi” kaba la thoh pynsahnam ïa ki kyrteng jong ki nongpdiang ba nyngkong jong ka Balang shnong Iooksi.
Ha ka por mynstep la pynlong ïa ka jingkñia Mass Iukharist kum ka dak ka jingsngewnguh ïa U Blei ïa ka jingri jingsumar jong U ïa ki paidriewngeit jong ka Balang shnong Iooksi, kaba la lamkhmat (Nongknia Rangbahduh) da u Most. Rev. Ferdinand Dkhar, Bishop ka Jowai Diocese ha ryngkat ki Lyngdohsohblei (Phadar) kiba wan na ki Parish bapher bapher jong ka Jowai Diocese bad nabar ha kaba nalor ki spah ngut ki khynnah rit kiba pdiang ïa ka Comunion ba nyngkong da ki hajar ngut ki paidriewngeit ki la iashim bynta ha ka iabam ka ïasip ïa u Kpu u Rynsi Uba long ka Met bad ka Snam jong U Trai Jisu Khrist.
U Bishop Ferdinand Dkhar ha ka sneng ka kraw (Homily speech) ia ki paidriewngeit, u la ainguh ïa U Blei U ba la kyrkhu kyrdoh ïa ki paidriewngeit jong ka Balang shnong Iooksi bad Uba jied ïa ki Nongshong shnong na u wei u Rangbah, u Alexander Papeng ha ka snem 1923 bad mynta ki don haduh 222 ïing ki ïingkhristan bad u kyrmen skhem ba U Blei Un dangïaikhot shuh shuh ïa ki para shnong parathaw ha ki por bad ki snem ki ban dangwan. Ki Rong jyrngam baroh ki jingpynriam pynbeit ki rong jyrngam suda, kane ka pyni ïa ka dak ka jingkyrmen ïa ka jingroi bad ka jingïaid shaphrang jong ka Balang ban shuh shuh u Bishop Ferdinand Dkhar. U Bishop Ferdinand Dkhar ha shwa ba un pynkut ïa ka jingkren jong u, u la ong ba lada don kano kano ka jingïathut lane ka jingwit ha kine ki shispah snem kiba la dep, kumba ngi jam sha ka spah snem kaba ar kumta ruh ïa pynbeit ïa kino kino ki jingthut ki jingwit bad to ïatrei lang.
Ha kane ka sngi pynkut ïa ka jingrakhe Centenary jong ka Balang Katholik shnong Iooksi la ïawan sakhi lang da u ma Vincent H Pala, MP Lok Sabha, u Rubinus Syngkon, MDC, u Bahun Dkhar MDC, ma Gilbert Sten Ex-MDC, ma Nehimaya Tyngkan bad kiwei de ki riew khmat jong ki kynhun Balang bapher bapher.
Ha ka por ar baje nohphai sngi la pynlong ïa ka Proseshon Iukharist bad pynkut da ka jingkyrkhu ïa ki nongïashim bynta bad ïa ki nongshong shnong jong ka Iooksi da ka Sakrament Bakhuid tam ka Duwan.