Khliehriat, K’lyngkot, 21: Ka Jaiñtia National Council Western zone (JNC-WZ), lyngba u kyrwoh na u Vice President, u bah Hamehi Bamon, ka pynpaw ba ka seng ka dap da ka jingbitar haka ba ïadei bad ka jingpynmih jong ka sorkar jylla ïa ka jingrwai Meghalaya state anthem ha kane ka 20 tarik mynta u bnai, snem 2024 hapoh ka jingialam u Myntri rangbah, u Conrad Sangma, haka ba la paw tang ha ka ktien Khasi, ka ktien Garo bad ka ktien English, la ong ba ka seng kam sngew lah ban pdiang da lei lei ruh bad kynnoh ruh ba kane ka long kum ka jinglyndet bad leh klet ka sorkar ïa ka ktien Jaiñtia ha kane ka jingrwai anthem.
“Kum ban shu pynkyn-maw ba ka Meghalaya kadei ka jylla jong ki lai ki riewlum, kata ka Khasi Garo bad Jaiñtia, naduh ba la ioh ïa ka jinglaitluid na ka jylla Assam ha u snem 1972, ka lah don ka jingthoh ba ka Meghalaya ka Don lai tylli ki major tribes ba kynthup ki Khasi, Garo bad Jaiñtia hynrei ka jingbym burom ka sorkar iaka ri lum Jaiñtia kaba Don la ka jong ka ktien ka pyni shai ba kane ka sorkar hapoh ka jingialam u Conrad Sangma ka la ibeiñ bad iuhroit ïa ka hok jong ka Ri lum Jaiñtia bad na ka liang jong ka seng kam lah ban pdiang ïa kane ka jingleh jong ka sorkar” ong u kyrwoh.
“Donkam aiu ban pynmih ïa ka anthem ha ka ktien nongwei (English) bad ieh pat ïa kaba la don lypa?, ka Jaiñtia Hills Autonomous District Council JHADC ha u 2021 ka la dep pass ïa ka resolution ban ithuh noh ïa ki dak thoh haka ktien Jaiñtia na ka bynta ka Jaiñtia hills bad mynta ka sorkar ka la pyni shai ba kam shym la burom satia ïa ka rai ka District Council bad kane hi ka la paw shai ba ka Sorkar imat ka don aiu re aiu sha lyndet ban pynduh noh ïa ka Ri lum Jaiñtia kaba la ri la sumar naduh ki nongïalam na hyndai hynthai”.
“Ka seng ka dawa na ka sorkar ba kan pynkylla ne pynmih shisyndon ha ka ktien Jaiñtia lym kumta ngim nym pdiang satia ïa ka ta ka State anthem hapoh Ri lum Jaiñtia ïa kaba la pynmih daka sorkar ha ka to ka sngi kaba dei ha District Library Auditorium Tura”
“Kaba pynsngewsih shuh shuh ïa ki nong Jaiñtia ka long ba haka to ka video ba la mih ruh naduh ka shad tynrai haduh ka riam tynrai, ka Jaiñtia kam paw satia tang Khyndiat ruh ha kaba iadei bad ka riam bad ka shad tynrai ki nong Jaiñtia, bad kane ka la pynduh mynsiem shi katdei eh ïa ngi ki nong Jaiñtia bad ïa kane ka sorkar ka hap ban jubab ba na kaei ka daw bala pynduh bynta ïa ka Jaiñtia”.
“Ka JNC ka pynpaw ruh ïa ka jingsngewsih ha ka ba ïadei bad ki nongmihkhmat ka ri lum Jaiñtia, ki don haduh 7 ngut ki MLA bad 30 ngut ki MDC hynrei ki shu peitkai bad sngap jar ïa kane ka jingleh ka sorkar, hato ki pdiang ne em ïa ka ne ka bynta? Ka seng ka sngew ruh ban ong ba haba don lai ki major tribes ka sorkar ruh ka hap ban burom ym ban shu leh lyndet , balei ka ri lum Jaiñtia kam don hok ban ioh bynta lem? pynkut u kyrwoh na u Vice President ka JNC-Western Zone u Hamehi Bamon.
