Khliehriat, K’lyngkot, 21: Ka Jaiñtia National Council JNC ka la jied thymmai bad pynskhem ïa ki nongkitkam jong ka JNC Khliehriat Circle, kata hadien ba la kut ka samoi treikam jong ki nongkitkam jong ka Circle, ïa kane ka jingïalang jied nongkitkam la pynlong ha ohis treikam jong ka JNC sengkmie ha Khliehriat kaba dei ruh ka Headquarter jong ka seng.
U President rangbah ka JNC, u bah Sambormi Lyngdoh u la shim ïa ka bynta kaba hakhmat ha kaba u la pynskhem ïaki nongkitkam ba thymmai jong ka Khliehriat Circle bad ong ruh ba kane ka Circle ka dei kawei na ki Circle kaba long kum ka sharak kaba ai jingshai ïa kiwei pat, namar ha kane ka Circle ki mih kita ki nongïalam ba kynsai kiba long ruh ki ba lah nang lah stad ban ai ïa ka jingshakri kaba pura ïa ka ri bad ka jaidbynriew, u la bynrap ruh da kaba ong ba “Mynta ngi hap ban husiar bha namar ki don kita ki langïong kiba kup snieh langbtot hapdeng jong ngi kiba pyrshang ban pynsniew dur ïa ka jingmut jingpyrkhat bad ka jingthmu ban ïalam ruh shaka lynti ka bym dei hok bad ka bym iahap bad ka imlang ka sahlang, te lada ngi ngop kin mih sa tang ki nonglilam ym shuh ki nongïalam ” ha kajuh ka por u la ai ki kyntien kitbok kitrwiang ruh ïa ka Circle ba kan nang ïai shakri hok bad ieng skhem ha ka nongrim ba kaei ka seng ka juh hikai.
Kiba la ïa don ryngkat ha kane ka sngi ki kynthup ruh u General Secretary JNC u bah Wanshwa Suting, ki Vice President KNC, u bah Ency Shadap bad u bah Nangjan Dkhar, u Publicity & information Secretary, u bah Mebanteilang Sukhlaiñ
Ki nongkitkam ba thymmai ki kynthup ïa u President bah Shanborlang Bamon, Vice President bah Sanjoy Bareh, General Secretary bah Daiamond Bareh, Assistant Secretary bah Trebor Shylla, Organi-sing Secretary bah Miki Talang, Sport Secretary bah Miki Bamon bad u bah Lionel Dkhar, Education Secretary bah Damian Suja, Publicity Secretary bah Nubo Sumer bad u bah Pyniolad Muksor, Finance Secretary bah Rimiki Dkhar, Art & Culture Secretary bah Shanborlang Langstang, Decipline Secretary bah Rowlandson Pale, Office Secretary, u bah Jerry Nongtdu, Environment Secretary, u bah Fourly Talang bad 22 ngut ki dkot ka executive committee.
