Dang sah u Sohkhliang ha ki dohnud kiba ïeid ïa u Bah (L) E.K Mawlong

Naba shah kynnoh lilam ïa ka Meghalaya House Kolkata

0

Nongpoh, Risaw 19: Wat hadien ba la dap pura la 14 snem ba u Bah (L) E.K Mawlong u la khlad noh na kane ka pyrthei ha ka 18 tarik u Risaw 2008 bad ba ki paidbah ka Umroi Constituency lem bad ka ing ka sem ki la kynmmaw burom ïa u kum uta u nongïalam paidbah hynnin ka sngi ha Little Flower Higher Secondary School, Mawbri, hynrei ki jingmong bad u sohkhliang ba la mong ha ki paidbah ka Umroi Constituency ka dang sahkut haduh kine ki sngi halor ka jingshah kynnoh ba u (L) E.K Mawlong u dei u nongdie ri bad uba la lilam ïa ka Meghalaya House Calcutta.
Kum ban pynkynmaw, ha ka jingkynmaw tympang ïa ka lyngkhuh sngi ïap ba 14 snem u (L) E.K Mawlong kaba la long hynnin ka sngi ha Mawbri, ki paidbah ka Umroi Constituency lem bad ka ïing ka sem bad khamtam ruh kito kiba ïeid kyrpang ïa une u rangbah ki la ai burom da kaba pynlait paidbah ïa ka kot ba la thoh da u khun ba ar jong u, u Fedinand Banshanlang Lyngdoh, bam kwai ha dwar u Blei ba la ai kyrteng, ‘E.K Mawlong, A Political Biography’ bad ruh la sam kyrpang da ki khusnam sha ki samla pule ka Umroi Constituency ba la ai kyrteng, ‘ E.K Mawlong Academic Excellence Award 2022’ kum shi bynta ban ai burom ïa une u rangbah uba ki paidbah ki don ka jingieit ba kyrpang kum uta u nongïalam khamtam hapoh ka Umroi Constituency.
Kiei kiba la paw shabar na ki riew rangbah bad kito kiba don ka jingïeid ba kyrpang ban burom ïa u Bah E.K Mawlong kum uta u nongïalam paidbah ha katei ka jingleh burom ïa ka lyngkhuh sngi ïap ba 14 snem jong u, ka dei ka jingkren bynñiaw bad ki dak mong lane u sohkhliang u dangsah ha ki dohnud jong kito kiba ïeid ïa u Bah E.K Mawlong halor ka jingshah kynnoh ba u la dei u nongdie ri bad uba la lilam ïa ka Meghalaya House Calcutta.
Haba kren halor kane ka jingshah kynnoh u (L) E.K Mawlong kumba la pynpaw da u khun rangbah jong u, u Bah George B. Lyngdoh, uba dei ruh u MLA ba mynta ka Umroi Constituency, ka dei ka jingkynnoh ba khlem nongrim bad kaba khwah ban pynthoh bria u Bah E.K Mawlong, hynrei katkum ka jingbishar ka ïing bishar badonburom ka High Court ha ka 28 u Kyllalyngkot 2008 ka la pynksan ba u Bah E.K Mawlong ym shym la don bynta ei ei ban lilam ne die duh ïa ka Meghalaya House ha Calcutta.
La don ruh uwei na u rangbah uba la ïa trei ryngkat ha kti ha kjat bad u (L) E.K Mawlong, u la kren bynñiaw halor kane ka jingshah kynnoh bad ka jingshah pynthohbria u Bah E.K Mawlong bad ka la poi u pud haduh ba ka la ktah ïa ka jingmut jingpyrkhat jong u, ka ing ka sem, ki paidbah bad ka la ktah bad pynhiar arsut ruh ïa ka koit ka khiah jong u, na ka daw kitei ki jingshah kynnoh ba khlem nongrim bad ka jingshisha ka ieng rasong ka dei tad haduh ba ka High Court ka la pynksan ba u Bah E.K Mawlong um don bynta ei ei halor kitei ki jingshah kynnoh ba la lilam ïa ka Meghalaya House ha Calcutta, pynpaw utei u rangbah.
U la pynpaw ruh ba u la don bynta haduh 25 snem ban ïa trei ryngkat ryngkat bad u Bah E.K Mawlong bad u la sakhi hi da lade ba u Bah E.K Mawlong um dei u briew uba long kumta bad u dei u briew uba don ka jingieit ba kyrpang ïa ka jaid bynriew bad uba don shisha ka jingkitkhlieh kum uta u nongïalam paidbah uba trei na ka bynta ka bha ka miat bad ka roi ka par bad ym kumba la shah kynnoh haduh ba kane ka la ktah mationg bad u sohkliang u dang sohkut ha ki dohnud jong kito kiba don ka jingieit ba kyrpang ïa une nongïalam paidbah na Umroi Constituency.
Shuh shuh, kaei kaba la pynpaw da une u rangbah, u la pynpaw paidbah beit ba haduh kine ki sngi ki don lai ngut ki riew pawkhmat ka jylla kiba la kynnoh pyrshah ba u Bah E.K Mawlong u long u nongdie ri bad uba lilam ïa ka Meghalaya House bad haduh mynta ki paidbah kiba ieit ïa u Bah E.K Mawlong kim kwah shuh ban peit wat ïa ka khmat jong kitei ki riew paw khmat ha kaba ki isih bad ki ijli ban peit ïa ki halor ka jingkynnoh ba klem nongrim bad ba khlem da wad ïa ka jingshiha kaba la pynhiar dor ïa ka kyrdan nongïalam u Bah E.K Mawlong, uba long shisha u nongmihkhmat paidbah bad ym kumba la shah kynnoh, pynpaw utei u rangbah.

Leave A Reply

Your email address will not be published.