Dang duna ka jingpynmih dohsniang hapoh ka jylla, donkam 18 hajar MT shisnem

0

Jowai, Naiwieng 03: U Myntri Rangbah duh ka Jylla u Conrad K. Sangma haba ai jingkren ha ka jingïalang kaba la long ha Shnong Raliang mynta ka sngi ula pynsngew ba ka jylla Meghalaya kala jur bha ka jingdawa ïa ka doh kaba la kot sha ka 18 hajar Matric Ton ka jingbam doh sniang manla ka snem bad lada kheiñ da ka pisa kala poi sha ka 630 (Hynriew spah lai phew) klur tyngka.
Halor kane ka jingdawa doh kaba jur bha hapoh ka jylla bad kaba sngewsih ka long ba ka jylla ka dang hap ban shaniah ban pyndap ïa ka doh na kiwei pat ki jylla jong ka Ri India kaba la kot sha ka 50 percent kiba wan ban pynpoi (Supply) kum na ka jylla Haryana, Punjab, Bihar, Tamilnadu, Telangana bad na Andhra Pradesh.
Bad lada khieñ ba ki nongbam doh napoh ka jylla Meghalaya ka pisa ban siew ei sha katei ki jylla ka bai doh kaba la kala kot sha ka 315 (lai spah khadsan) klur tyngka bad kala long pynban kum ka lad ban ïarap ïa ki nongrep jong kitei ki jylla.
Na ka liang u Myntri rangbah ula pynsngew sha ki nongrep ‘lada ngi lah ban pynmih hi nalade ïa ka doh na ka bynta ka jingdonkam ka jylla’ kan sa long pat ka lad jingïarap ban kynshew ïa katei ka pisa ba kan nym leit ei shabar na ka jylla.
Dei halor kane ka nongrim ba ka sorkar kala shim ka jingkitkhlieh ban wanrah ïa ka skim Piggery Mission kaba heh duh hapoh ka jylla bad na kane ka mission kan sa lah ban pyndap ïa ka jingbam doh hapoh ka jylla ong u myntri rangbah. Ha ka juh ka por u buh ka jingkyntu ïa baroh ki nongrep kumjuh ïa ki kynhun SHG kiba la ïoh jingïarap na kane ka skim FOCUS ba kin pyntreikam hok ïa ka khnang ba ka jylla kan kiew ha ka kam pynmih doh.
Lah ban kdew hangne ba ka sorkar jylla lyngba ka FOCUS bad L aive Stock Mission, ka la sam sniang ban ri ha kylleng kylleng ki jaka jong ka jylla, ïa kaba la sam lyngba ki Block bad ka tnad Animal Husbandry and Veterinary.

Leave A Reply

Your email address will not be published.