Ka jingpynbeit pud baroh ki sorkar ki la pyrshang ym tang kaba mynta: Jambor War

Shillong, Naiwieng 03: U Executive Member(EM) jong ka Khasi Hills Autonomous District Council(KHADC) ba peit ïa ka tnat Elaka u Bah Jambor War u la ong ba ka sorkar ba mynta kam dei ban kam nongkynti ïa ka jingpynbeit pud ba dei tang ma ka ba leh ïa kane ka kam namar baroh ki sorkar kiba naduh mynshuwa ki la pyrshang ban pynbeit ïa u pud u sam jong ka jylla wat la ka jingpyrshang jong ki kam lah ban urlong pura.
Haba jubab ha ka Dorbar Tlang jong ka KHADC ïa ka Motion ba la wanrah u Bah Bindo M Lanong halor ki siejam kiba ka konsil kan shim ïa ki lad ki lynti ba ki shnong Khasi bad ki jaka jong ki Hima Khasi kin ym dei ban duh ei na ka liang u Bah Jambor u la kular ba kum u dkhot ka Regional Committee ba la thung da ka sorkar un pyrshang ha la ka bor ban rah ha ka komiti ban pynpaw ïa kaei ka jingkwah ka konsil ba ki shnong kiba ka Boundary Committee ka konsil ka la thung ka lap ba ka dei ka jong ki Hima Khasi kin dei ki ban don beit sha ka jylla Meghalaya.
U Bah Jambor u la ïathuh ruh ba na ka liang ka komiti ba la thung da ka sorkar kan ai jingtip sha ka konsil ïa ki shnong kiba ka kam ba dei ka jong ka jylla bad ba ka konsil kan ïoh ban peit shuwa ïa ka kyrteng kita ki shnong shuwa ban ïaid sha khmat.
Ha ka jingïatai u Bah Bindo u la ther tyngeh ïa ka jingleh kyrkieh ka sorkar ban pynbeit ïa u pud u sam da kaba ïaid lait lut ïa ki trai jaka bad ka konsil bad u la ong ruh ba ban ïa kaba leh kyrkieh kum kane ka sorkar kaba wanlam pat ka jingduhnong ïa ka jylla bad ka jingduh ei ki jaka dang lah kaba kane ka kam kan sah pongding shuwa.
Ha kane ka jingïatai la shim bynta da u Bah Charles Marngar MDC Mawhati uba la pynpaw ha ka dorbar ïa ka jingeh kiba ki paidbah ha ka constituency jong u ki kynduh bad ka jingshah pyndik na ka por sha ka por ha ka Assam bad uba la ai jingmut ruh ba ki MDC baroh kin hiar da lade sha ki shnong ba ïa kajia pud ban sngewthuh ka jingeh kaba ki paidbah ki mad.
U la buh ruh ka jingkyrpad ba ka konsil kan shimkhia ban pynïoh biang noh ïa ki jaka ba dei ïa ka Block I bad II namar ki paid Khasi ha kitei ki shnong ki pynpaw ïa ka jingangnud ban wanphai biang sha ka jylla Meghalaya.
U la ïathuh ruh ba na ka liang ki paidbah ka Block II kim shym la shim bynta shuh ha ka ilekshon sha ka Karbi Anglong Autonomous Council namar ki kwah dik dik ban wan phai biang noh sha ka jylla.
Haba ïadei bad ka jingtyrwa na u MDC ka Mawhati ba ki MDC baroh kin leit ïuhkjat da lade sha kine ki jaka ha khappud na ka liang u EM u la ïathuh ba ka EC ka pdiang ïa kane ka jingai jingmut bad ba kan don ka jingleit jngoh ha kine ki sngi kiban sa wan ïa kine ki shnong khappud ba don jingkajia pud bad ka Assam.