Dang bteng ka pakhang surok ka JAC ha Narpuh, ai jingkyrshan ki kynhun ñiah kali

0

Khliehriat, Jylliew, 20: Ka jingpakhang surok ba la pynlong naduh ka sngi Balang da ka JAC Dong Namchiang ka dang ïai bteng haduh mynta bad ka Joint Action Committee jong ki kynhun bapher bapher ba kynthup ia ka East Jaiñtia Limestone Supplier Association (EJLUSA), ka East Jaiñtia Hills Truck Owners and Transporters Association (EJHTOTA) bad ka East Jaiñtia Hills Drivers Association (EJDA) ha ka sngi Palei ki la leit sha ka shnong Umkiang ban ai jingkyrshan ïa ki dkhot jong ka JAC Dong Namchiang kiba dang iai bteng ban shong ha surok National Highway ban pakhang surok.
Ha ka jingiakren bad lad pathai khubor ha Umkiang, u Secretary jong ka JAC-EJLUSA, EJHTOTA, EJHDA Bah Deolangki Dkhar u la ai ka jingiaroh ïa ka jingiatylli jong ki paidbah ka thaiñ Narpuh kiba ieng kaba na ka bynta ka bha ka miat bad ka jingmyntoi lang jong baroh ki paidbah.
“Shisha ka surok NH-6 ka dei u budlum jong ka jylla Meghalaya bad kumjuh ruh jong kiwei pat ki jylla kiba don ha ka thaiñ Shatei Lammihngi. Kawei nga kwah ban pynsngew sha ka Sorkar ba ka JAC jong ki lai tylli ki seng ngi tip bha ba ka East Jaiñtia Hills District ka dei kaba ju pynmih bun bha ka khajna ïa ka Sorkar da ka jingdon ki mar poh khyndew, hynrei kaba sngewsih ban ong ba ngim lah shuh pat ban tip ba balei kane ka Sorkar ka ibeiñ haduh katta katta ïa kane ka thaiñ jong ngi. Ka jingshah ñiewbeiñ ki paidbah ka District ka la long shaba palat. Ngi pynrem jur ïa kane ka Sorkar kaba la lam khmat da u Conrad K Sangma kum u Myntri Rangbah. Na kaei ka daw ba u leh ïa ngi haduh katne katne,” u la ong.
“Katkum ka jingtip jong ngi, ki la don ki hukum ba ladep pynmih da ka Ingbishar Meghalaya High Court ha kaba iadei bad kane ka surok, hynrei imat kine ki hukum ki shu sah tang ha ki jingthoh bad ha ki kam pat kam pat shym la urlong satia. Ngi dawa ba nangne shakhmat kane ka Sorkar ka dei ban phah trei noh kloi ïa kane ka surok khang ba ki paidbah kin ym mad jingeh than, namarba ki paidbah na Umkiang, Ratacherra ha ka jaka ban poi kloi hynrei ki hap ban ïaid da ki bun kynta ban poi sha Khliehriat,” u la ong shuh shuh.
U Bah Dkhar, u la iathuh ruh ba ha shwa ban pynlong ïa kane ka jingiakhih, ka la don ka jingdheng kali kaba la neh haduh phra sngi lynter ha kane ka thaiñ bun ki paidbah kiba leit ba wan ki la sahkut ha ka jingdheng kali kaba jur bha.
“Hooid ngi iohi ba ka la don ka jingmang tynga ban maramot ïa kane ka surok, hynrei ngi kum ka JAC ngi kwah ba ka Sorkar kan pyni da ki kam ha surok hi khnang ba ki paidbah kin kham suk ha ka leit ka wan. Nga pynsngew ruh sha ki paidbah ba ka jingshah iehbeiñ ka thaiñ ha u Conrad Sangma ka la i pynban kumba kine ki paidbah kim don nongmihkhmat na ka thaiñ bad la i ruh kumba kine ki paidbah kim ju siew khajna surok sha ka sorkar, la i ruh kumba ka Sorkar kam kheiñ ba ki paidbah ka thaiñ ki hap hapoh ka jylla Meghalaya,” u la ong bad bynrap, “kumta nga sngew ban ong ko Sorkar ka JAC jong ngi ki lai tylli ki seng, ngi dawa na ka Sorkar ba ka dei ban pyndep kloi ïa ka jingmaramot bha ïa kane ka surok.”

Leave A Reply

Your email address will not be published.