Daka video phah ka JNC ba julor ki ar tylli ki jingtei ka sorkar ba shu iehnoh ïingjah ha East Jaiñtia Hills District
Khliehriat, Nailur 21: Ka Jaiñtia National Council (JNC) mynta ka sngi hapoh ka jingïalam u General Secretary, u bah Wanshwa Suting ki la leit ban jurip ïa ki ar tylli ki jingtei kiba dei ki project jong ka sorkar ha East Jaiñtia Hills District kawei kaba don ha Byndihati bad kawei ha Umtyra kiba la shu iehnoh ïing jah khlem da pyntreikam ïa ki mynta la bunsnen hadien ba la dep ban tei, ka seng ka la phah ruh da ki video ba ki la ring dur sha ka sorkar ban pyni ïa ka jinglong jingman jong ki jingtei kiba la shu iehnoh ïing jah.
Ki ar tylli ki jingtei ba jurip ka JNC ki dei ka Residential School kaba don ha shnong Byndihati kaba la dep ban pyllait ïa ka mang tyngka ha u snem 2015 bad la lah ruh ban pyndep ïa ka jingtei (building) hapoh ki 24 bnai, kumjuh ruh ka Teachers Traing Centre, kaba don ha Umtyra, ba la dep pyllait ïa ka pisa ha u snem 2016 bad ïa ka jingtei la lah ban pyndep “hynrei kaei kaba sngewsih ka long ba haduh mynta ka sorkar kam pat shym la lah ban pyntreikam ïa kine ki ar tylli ki project bad la shu iehnoh ïingjah, na ka liang ka seng ngi suba jur ruh ba ioh ka don pynban kaei re kaei sha lyndet” ong ki nongïalam ka JNC.
Haka jing jurip, ka seng ka lap ba ki jingkhang ïit bad ki jingkhang heh ki la pait lut, la i ruh kumba ka la don ka jingshah rong bad shah tuh lut ki tiar ki tar, la i kumba wat ïa ki nar ba ker ïa ki jingkhang ïit ruh la shah kyndang lut bad hapoh ki kamra ruh la lap ba la dap sa tang ki bilor jot bad kinjaboh ba isaitmet, la ong ruh ba kane ka jingshah iehnoh ïingjah kitei ki ar tylli ki jingtei ka la long pynban kum ka jingailad ïa ki nongleh kam sniew ba kin pynlong kum ki ktem ba kin ioh rieh tngen bad leh kam sniew ha kine ki jaka bad kane kan wanrah ïa ka jingma kaba khraw khamtam ïa ki nongleit trei bylla bad ki nongrep ba ïaid lyngba na ki ne ki jaka, pynpaw shuh shuh u Genareal Secretary ka JNC.
“Kumban shu pynkynmaw, dang myn ba ha kine ki taiew ba la dep ha ka 6 tarik u nailur ka seng ka la iakynduh mar khmat bad u symbud myntri rangbah ka jylla u bah Sñiawbhalang Dhar bad ngi la dawa ba dei ban pyntreikam noh ïa kine ki project kiba la shu iehnoh ïingjah bad u bah Sñiawbhalang Dhar u la kular ba hapoh shi taïew un sa khot jingialang hynrei haduh mynta ym pat shym iohi satia ïa kano kano ka dak, kumta ka seng lyngba kane ka video ba la ring ngi la phah sha ka sorkar ba kan peit hi da la ki jong ki khmat ban iohi ïa ka jingshisha baroh bad halor kane ka seng ka pynkynmaw biang bad ka kyntu jur ruh ïa ka sorkar ba kadei ban leh ei ei halor kane ha shwa ba kine ki jingtei (building) kin pait lut namar kane kan wanrah ïa ka jingduhnong bad ruh lada pyntreikam noh ïa kine ki project kan long ka jing myntoi shibun naduh ïa ki khynnah pule ka thaiñ khamtam kito ki khynnah kiba na ka thaiñ nongkyndong bad kito kiba na ka long ïing ba duk, kumjuh ruh kan wanrah ïa ka lad iohkam ïoh jam ïa ki samla wad kam bad kan kyntiew ruh ym tang ïa ka thaiñ hynrei ïa ka Jylla hi baroh kawei” ong u bah Wanshwa Suting.