Ha ka rta ba 53 snem pyndep Graduate i Kong Lakyntiew Syiemlieh ha ka sobjek Khasi, pynkup burom ka KSU

Nongpoh, Nailur 21: Ka jingduk, ki jingeh bad jingjynjar kim lah ban khanglad ïaka jingthrang jong kawei ka longkmie ban pyndep ïaka jingpule wat haka rta kaba la kham rangbah bad don ruh la ki jong ki khun ki ksiew, kane ka dei ka kong Lakyntiew Syiemlieh kaba shong ba sah ha Lum Umpih Umsning kaba dang shu pyndep ruh ïaka Graduate haka Bachelor of Arts haka rta kaba 53 snem na Balawan College, Umsning.
Kane ka longkmie ka dei kaba trei shitom bad angnud ban pyndep ïaka jingpule wat hadien ba kala ioh khun ioh ksiew kaba long ruh ka nuksa kaba bha ïa kiba bun ki khun samla ba ka jingpule bad ka pule puthi ka dei ka atiar ha kane ka juk ba mynta wat hapdeng shibun ki jingeh jingjynjar ban bsa ïala ki khun pynban katei ka long ka pynlut por ruh ïalade ban pule kot ban pyndep ïaka jingpule.
Halor ka mynsiem jong katei ka longkmie kaba shlur bad angnud ban pyndep ïaka jingpule haduh ka Graduate, naka liang ka KSU North Khasi Hills District lyngba ka Education Cell haka jingïalam u Samla Banjop Maring Chairman, Samla Toning Lapang Secretaty haka jingdonlang u samla James Hitler Mawphñiang General Secretary ka KSU NKHD, Samla Jester Nongbet Publicity Secretary Umsning Circle bad ki nongïalam ka KSU Lum Umpih Unit mynta ka sngi kila leit ban pynkup burom ïa katei ka longkmie ha iingsah jong ka ha Lum Umpih, kum ka jingai mynsiem bad ka jingpynshlur ïa kiwei ruh ba ka jingduk bad ki jingeh jingjynjar kim dei ban khanglad ïaka jingthrang kaba ki don.
Kum ban shu kdew hangne ka kong Lakyntiew Syiemlieh kala don 4 ngut ki khun bad 2 ngut ki ksiew kaba hap ruh ban pynbiang ïaki jingdonkam ha ïing ha sem baroh da kakam hikai skul ha Persara UP School bad kam dei kaba suk ban bate ïaka por ban peit ïaki khun, ka por leit hikai, bad ka por khreh kot khamtam kum ka longkmie kaba hap ruh ban peit ïaka iing ka sem baroh.
Naka liang u Samla James Hitler Mawphñiang bad u Samla Banjop Maring haba kren ha katei ka sngi kila ai ka jingïaroh ïa katei ka longkmie kaba lamkhmat ban pyndep ïaka jingpule wat haka rta kaba la 53 snem kaba long ka jingsarong bad ka nuksa ba bha ïa kiwei ki samla pule ba kimndei ban kynran dien haka jingpule watla shibun ki jingeh hynrei ban don ïaka thong bad ka jingangnud kum katei ka longkmie.
Naka liang ka Kong Lakyntiew Syiemlieh kala ai ka jingkhublei ba kyrpang ïaka seng KSU kaba la kynmaw ban pynkup burom ïaka ha katei ka sngi, kaba la pynpaw ruh hakhmat ki nongïalam seng ba ka dang kwah ban bteng sa ka Master Degree hynrei namar ka jingduk bad ka jingnang jam haka rta kam shym ioh lad shuh nalor ka kam ba ka hikai skul bad naka liang katei ka longkmie kala ai ruh ka kyrkhu kyrdoh ïaki nongïalam seng ba kin nang trei shitrhem haka kam ba ki shakti haka imlang ka sahlang baroh kawei.