Shillong, Nailur, 21: Ka Khasi Students Union (KSU) Mawiongrim Unit ka la byrngem tyngeh ïa ki bor pynïaid jong ka Adsan Mahindra ba kam dei ban pyndonkam bakla ïa ka kyrteng jong ka shnong Mawiongrim da kaba pynkylla sha ka kyrteng Barapani.
Ka seng ka la ïoh jingtip halor kane na ki nongshong shnong jong ka shnong Mawiongrim hadien ba ka Adsan Mahindra ka la pyllait ïa kawei ka Advertisement ha ka rynsan Social Media bad kiwei kiwei ki lad pathai khubor da kaba pynpaw ba ka Adsan Mahindra ka don ha Barapani.
Hapoh ka jingïalam jong u President u samla Domayan Skhemiew ha ka sngi Palei ki la leit ban ïakynduh ïa ki bor pynïaid jong ka Adsan Mahindra bad dawa ba dei ban pyndam mardor ïa ka Advertisement ba la shu pynkylla kyrteng khlem nongrim ïa ka shnong Mawiongrim sha ka ‘Barapani.”
Ka seng ka la pynpaw ba kane ka jingleh jong ka Adsan Mahindra ka la pynbitar ïa ka Seng bad ïa ki paidbah nongshong shnong jong ka shnong Mawiongrim bad na kane ka jingleh jong ka kompeni ka la ïalam bakla ïa kiba bun bad khamtam ïa ki briew kiba nabar.
Mar mar ka Seng ka la dawa ïa ki bor pynïaid jong ka Adsan Mahindra kaba don hapoh u pud u sam jong ka shnong Mawiongrim ban pynbeit noh mardor hapoh shitaiew hynrei lym kumta ka seng kam banse ban shim da kiwei pat ki sienjam ba tyngeh pyrshah ïa kane ka kompeni die kali.
“Ka seng ka maham tyngeh ïa baroh ki kompeni lane ïa ki briew kiba ju wan leh ïa ka khaii ka pateng hapoh u pud u sam jong ka shnong Mawiongrim ba kim dei ban leh klumar lane ban pyndonkam bakla ïa ka kyrteng jong ka shnong Mawiongrim ïa kaba la buh bad la suit la shor naduh ki por u mynbarim,” ong u kyrwoh ba la phah da u General Secretary ka KSU Mawiongrim Unit u samla Macdonald Jitem.
