Ïa kynduh ka KSU ïa u Chairman jong ka Meghalaya Rural Bank
Na ka bynta ban plie branch thymmai ha Ranikor bad Wahkaji ne umdohlun
Mawkyrwat, ‘Nailur 21: Ka Khasi Students’ Union (KSU) jong ka Ranikor Circle bad Khasi Students’ Union (KSU) jong ka Umdohlun Circle ka la la leit ban ïakynduh ïa u Ashish Yadav uba dei u Chairman jong ka Meghalaya Rural Bank (MRB) ban ïa kren halor ka jingdonkam ban plie jaka pynlang pisa ne Branch thymmai ha South West Khasi Hills District kata ha shnong Ranikor ne Photkroh bad kumjuh ruh ha Umdohlun lane Wahkaji.
Ha kane ka jingïakynduh ka seng ka la pynsngew ba ha ka thaiñ Ranikor Civil Sub Division ki don haduh 150 tam ki shnong hynrei kumba long mynta tang ka State Bank of India (SBI) kaba la buh jaka treikam ha kane ka thaiñ. “Ka jingdon tang kawei ka Bank ha Ranikor ka la buh jingeh shikatdei eh ïa ki paidbah ka thaiñ namar kam lah ban pynbiang ïa ki jingdonkam jong ki paidbah”, ong ka kyrwoh na ka seng.
Kumta, na ka liang ka seng ka la kyntu ba ka la dei ka por ïa ka Meghalaya Rural Bank (MRB) ba kan thaw lad ban buh thymmai sa kawei ka shnad treikam ha Ranikor lane ha shnong Photkroh khnang ba kan pynsuk ïa ki paidbah haba ïa dei bad ka jingdonkam ban thep ne sei pisa.
Ka seng ha kane ka sngi ka la ban jur ruh ba kan buh sa kawei ka shnad treikam ha Wahkaji lane Umdohlun Area namar kane ka thaiñ ka kynthup ïa palat 40 tylli ki shnong bad haduh mynta ym pat don kano kano ka Bank ka ba lah buh tnad ha kane ka thaiñ.
Namarkata, ki paidbah na kine ki thaiñ ki hap ban shong kali haduh 2 ne 3 kynta ban leit donkam ha ki Bank kiba don ha Mawkyrwat lane ki hap ban ban ïaid kjat haduh 3 ne 4 kynta lada ki leit donkam ha ka Branch jong ka State Bank of India ha Ranikor.
Ha kane ka jingleit ïa kynduh, ka seng ka sngewkmen ruh ba na ka liang u Chairman u la pynthikna ba un sa thaw ki lad ki lynti ban weng ïa ki jingeh jong ki paidbah ha kine ki thaiñ khnang ba ki paidbah kin kham suk nangne shakhmat. Kumta, ka seng ka la kyntu ruh ïa ki bor sorkar ba kin shimkhia lem khnang ba ki paidbah kin nym mad jingeh nangne shakhmat.
Ïa ka kynhun ban leit ïa kynduh la ïalam da u Dusterwell K. Lyngdoh, President KSU Umdohlun Circle bad u Marconi Thongni, President KSU Ranikor Circle ha ka jingsynran lang jong u Forwardman Nongrem, President KSU South West Khasi Hills District.
Kane ka dei ka kyrwoh na u Marconi Thongni, President KSU Ranikor Circle bad u Dusterwell K. Lyngdoh, President KSU Umdohlun Circle.