Ba la jot rathai palat ka surok Nongpoh sha Umden, kynduh EE ka HITO bad MPUF, dawa ban siang rong noh mardor

Nongpoh, Nailur 21: Ki ar tylli ki seng bhalang ba kynthup ïa ka Hynñiewtrep Integrated Territorial Organization (HIITO) Umden Area bad ka Meghalaya People’s United Front mynta ka sngi ki la leit syndon ban ïa kynduh ïa u Executive Engineer ka PWD Division ban pynpaw ïa ka jingsngewkhia halor ka jingsniew palat ka surok Nongpoh-Umden-Sonapur Road, ba ki paidbah da ki spah ki phew tylli ki shnong ba hap ha ka thaiñ Umden Nongtluh ki hap ban mad ïa ka jingeh kaba khraw na ka daw ka jingsniew katei ka ka surok ha ka leit ka wan ki paidbah.
Kum ban pynpaw,, kane ka surok kam dei satia tang ka surok ba da ki phew tylli ki shnong ha ka thaiñ Nongtluh ki kynduh mawsiang ha ka leit ka wan na ka daw ka jingsniew jong ka surok, hynrei kane ka surok ka dei ruh ka surok kaba pei lyngba sha ka jylla Assam (Interstate road), ha kaba lada ka sorkar ka lah ban shna da ka surok kaa paka kan long ka jngkyrkhu ïa ka jylla hi baroh kawei.
Ha kane ka sngi ba la leit ban ïa kynduh ïa u Executive Engineer ka PWD Nongpoh Division la ïalam da u President ka MPUF Ri Bhoi, u Bah Jackson Sohtun bad u President ka HITO Umden Area, u Bah Marius Mallai bad kynthup ki dkhot jongka bad ha kane ka jingïakynduh ïa une u ophisar ka tnad PWD, u Bah M. Pyrbot, kine ki ar seng ki la aiti ruh ïa ka dorkhas ban pynsngew halor ka jingeh ki paidbah na ka jingsniew katei ka surok ba ka tnad PWD bad ka sorkar ka la dei ban phai khmat ban siang rong noh da ka surok kaba paka.
Kum ka seng ki la pan jingshai ruh na u Engineer halor ka jingslem ban siang rong noh ïa katei ka surok ba ki paidbah la bun phew snem mynta ki syrtok ha ka leit ka wan bad ki la pynpaw ruh ba kim hun satia tang ban maramot ïa katei ka surok bad ki angnud ba ka sorkar kan thaw syndon da ka lad ka lynti ban siang rong pynbha ha shi lynter ka surok khnang ban long ka jingkyrkhu ïa ki paidbah ha ka leit ka wan.
Haba ïa kren bad ki Nongthoh Khubor, u President ka MPUF, Ri Bhoi, u Bah Jackson Sohtun u la ong ba ka seng ka la shim khia ruh ban leit kynduh ïa u Engineer ka tnad PWD Nongpoh, ka dei halor ka jingsngewkhia ba ki paidbah ki la syrtok palat ha ka leit ka wan na ka daw ka jingsniew katei ka surok bad shi bynta ban kyrsiew thiah ïa ka sorkar ka seng ka la ai da ka dorkhas sha u Engineer ba un ïa kren lem sha ka sorkar ba ka dei ban thaw noh ki lad ki lynti ban siang rong ïa katei ka surok kaba la donkam kyrkieh ban pynbha noh ban lait ki paidbah na ka jingkynduh mawsiang ha ka leit ka wan.
U la ïathuh ruh ha ka jingshisha ka la don ruh ka DPR ba la mang tyngka haduh 4 klur tam ban siang rong ïa katei ka surok kumba la lum jingtip na katei ka ophis u Engineer bad ym lah pat ban tip na kaei ka daw ba ka sorkar ka pynslem ban siang rong noh ïa katei ka surok ha kaba ïa ka DPR ruh la dep ban phah sha ka sorkar jylla.
Shuh shuh, u la ong ruh ba ka seng kam hun satia tang ban wan kynduh ïa u EE ka tnad PWD ban ïa kren halor ka jingnsiew katei ka surok na Nongpoh sha Umden bad pei lyngba sha Sonapur, Assam, hynrei ban suk ki paidbah ha ka leit ka wan ka seng shen kan sa leit ruh ban kynduh ïa u Symbut Myntri ka sorkar bad uba dei ruh u Minister ka tnad PWD ban dawa ba la dei ka por ba ka sorkar kan pynsted noh ban siang rong ïa katei ka surok, kaba ki paidbah ki la angnud la bun phew snem mynta bad ruh lada siang rong ka sorkar kan long shisha ka jingkyntiew ïa ka ioh ka kot jong ki paidbah ka thaiñ Umden Nongtluh ha Ri Bhoi District, u la bynrap.