Da ka skhim CM IMPACT+ yn kyrshan ka sorkar ïa ki skul Secondary bad Higher Secondary

Shillong, Nailur 16 : U Myntri Rangbah ka jylla u Conrad K Sangma u la pynbna ba ka kynhun Myntri ka la mynjur ban sdang pyntreikam ïa ka skhim CM IMPACT+ ka skhim Grant-in-Aid na ka bynta ki skul secondary bad higher secondary ha ka jylla.
U Conrad u la ong ba ka jylla ka don kumba 9 hajar tylli ki skul primary bad ka jingkheiñ ka hiar sha ka 1900 tylli haba poi sha ki secondary bad higher secondary hapoh ka Jylla bad haduh hynriew tylli ki block kim don wat tang kawei ka higher secondary school.
“Ka don ka jinghiar ha ka jingdon jong ki skul secondary bad higher secondary. Kumta, donkam ban don ka jingkyrshan kaba kyrpang na ka liang ka sorkar ban kyntiew ïa ki skul secondary bad higher secondary” u la ong.
Hapoh kane ka skhim thymmai, ki skul kiba dei hok kin ïoh ïa ka jingïarap pisa kaba lah ban pyndonkam katkum ka jingdonkam jong ki skul.
“Ka jingthmu jong kane ka prokram ka long ban kyrshan ïa ki 1,900 tylli ki skul secondary bad higher secondary. Kane kan ym long ha ka dur jong ki kam nonghikai ba la mang (sanctioned post) lane ka tulop ïa ki nonghikai hynrei kan long ka jingkyrshan pisa sha ki skul” ula ong.
U la ong ba ïa kane ka skhim yn pynïadei bad ka jingtreikam bad yn bishar bniah man la u snem.
“Ki skul kiba leh bha kin ïoh ïa ka jingkyrshan bad ïoh kham bun ka jingkyrshan pisa. Ka tnad pule puthi ka dang lum ïa ki jingtip ba bniah katkum ki jingai jingmut ba la ai,” ong u Myntri Rangbah ka Jylla haba bynrap ba yn sa pynmih ïa ka jingpynbna kaba bniah.