Shillong, Jymmang 21 : Ka Meghalaya Clean And Green Organisation (MC&GO) kan pynlong ïa ka mini Marathon ha ka 5 tarik Jylliew 2023 kaban sdang naduh ka por 6 baje mynstep, bad kaban sdang na Liar bang, ter ter ka ban ïaid lynti na kine ki shnong Liarkhla, Kdonghulu, Thadnongiaw, Khweng, Mawbri, Nongrim Nongladaw, Mawtneng, Umshaproh, bad pynkut sha Madan Kurkalang Bhoirymbong.
Ha Kane ka marathon kin don saw tylli ki kyrdan, ba kynthup ka Under 16 (shynrang bad kynthei), Above 16 (shynrang bad kynthei).
Kumta ka seng ka khot sngewbha ïa baroh ki riew ieit ïalehkai ban wan ïashim bynta ha katei ka jingpynïakob mareh marathon, la ka long kiba najan ne jngai ruh.
Ka phang pdeng (theme) jong kane ka jingmareh marathon ka long “Run Against Climate Change”. “Kum ka Seng ngi sngewkhia halor ka jingkylla jong ka Mariang bad suiñbneng, kumta ngi pynlong khnang ïa kane ban ai jinghikai sha ki paidbah nong shong shnong ka thaiñ bad ka Jylla hi baroh kawei, ba kum ki nong shong shnong ka Jylla ngi dei ban sngewthuh ba ka jingkylla ka mariang kan ktah ïa ka jingim long briew man briew jong kane ka pateng bad ki pateng ban dang wan hadien,” ong u Bah S. Nongkhlaw, Publicity Secretary kaMC&GO ha ka kyrwoh khubor.
Ïa ki form bad ki jingtip ba bniah lah ban ïoh na ki nongkitkam jong ka seng. Ha kane ka marathon yn wan pynshngaiñ ruh da u wei u khlur nong ïamareh ba la paw ka jylla bad uba la long ruh u nonghikai mareh (Coach), u Bah Jommingstar Ramsiej uba la jop ruh ïa ka Kolkata Full Marathon, Mumbai Full Marathon bad Delhi Full Marathon.
