Rung phainal ka Pyndenkynshliah L&UPS ha ka CMDL U-12 Years FT 2023

Lyngba ki 4 kol na u Robeljun Shangdiar

0

Mawkyrwat, Jymmang 21 : Ka Pyndenkynshliah Lower Primary & Upper Primary School hadien ba ka la pynliem noh pyrshah ïa ka Nongkdait Social Welfare Organisation da 7 – 0 kol ha ka lympung ïalehkai kynjatbol jong ki khynnah shynrang ba 12 snem kaba la tip kum ka Chief Minister’s District Level Under-12 Years Football Tournament 2023 ba la pynïaid da ka ophis jong u District Sports Officer, South West Khasi Hills District ka la ïoh ruh sha ka phainal kaba la pynlong hapoh madan Saitsnad, Mawlangwir, South West Khasi Hills District.
Haba phai ha ka jingïalehkai, ka Pyndenkynshliah LP & UP School ka la ïoh ban thep ïa ka kol ba nyngkong ha ka minit kaba 27 bad 32 da u Edestar Nongsiej, ha ka minit kaba 34, 36, 38, bad 40 na u Robeljun Shangdiar nangta kawei pat ka kol na u Jopharson Kharsyiemlieh ha ka minit kaba 41.
Ha kawei pat ka jingïalehkai kaba dei biang jong ki shynrang, ka Rangjadong Sports Club ka la lah ban pynliem noh pyrshah ïa ka Thangrai Sports Club da 3 – 0 kol ha kaba ïa ki kol la thep da u Pynshaikupar Thongni ha ka minit kaba 21 bad 40 katba ïa kawei pat ka kol la thep da u Khaiñkupar Ramsiej ha ka minit kaba 27.
Ha ka jingïalehkai jong ki khynnah kynthei pat, ka Rising Secondary School, Sohkhyllam ka la jop noh da 5 – 0 kol pyrshah ïa ka Ranikor Sports Club ha kaba ïa ki kol la thep da ka Susanna Lyngdoh ha ka minit kaba 4 bad 44, na ka Sharaihababet Lyngoh ha ka minit kaba 14 bad 48 bad na ka Rideshisha K. Lyngdoh ha ka minit kaba 41.
Kumta, ki kynhun kiba la poi sha ka phainal jong ka lympung ïalehkai kynjatbol ba la tip kum ka Chief Minister’s District Level Under-12 Years Football Tournament 2023 ki long ka Pyndenkynshliah Lower Primary & Upper Primary School, ka Rangjadong Sports Club bad ka Rising Secondary School, Sohkhyllam ha kaba ka Rising Secondary School, Sohkhyllam kan sa ïa khun pyrshah ïa ka Ninester Secondary School, Jakrem.

Leave A Reply

Your email address will not be published.