Shillong, Jymmang 21 : Ka jingïalehkai ka la pynshongshit bha mynta ka taïew ha ka lympung ïalehkai Meghalaya State League 2023, ha kaba baroh ar ki team ka Mawlai bad ka Ladthadlaboh ki la khur jingjop ha la ki jong ki group hadien ba ki la mad nam rem ha ki jingïalehkai ba lah dep, kata ka Mawlai na ka Shillong Zone bad ka Ladthalaboh na Jowai Zone.
Ha kiwei pat ki jingïalehkai jong katei ka sngi, ka Khliehmawlieh Youth Club ka la khur jingjop da kaba pynliem da 1-0 pyrshah ïa ka Chipakkore ha ka jingïalehkai hakhmat uba bun u paid nongkyrshan ha madan Chandmari Ground ha Tura, katba ka Pyndengrei bad ka Lumdiengngan ki la ïalehkai ha ka madan MDSA Ground ha Mawkyrwat ha kaba ka Lumdiengngan ka la pynliem da 1-0.
Ha Shillong Zone ka jingïalehkai ka long kaba mar ïakhaid bha, ha kaba ka Mawlai ka la ïakhun pyrshah bad ka Langsning ha ka Group A ha ka jingïalehkai ha madan Third Ground jong ka MFA ha Polo, bad ka Mawlai ka la jop da 2-1.
Ha ka jingïalehkai dei ka Langsning kaba la lamkhmat nyngokong lyngba ka shi kol ba la thep da u Banteilang Lyngdoh ha ka minit ïalehkai kaba 39, ïa kaba la ïarap pashat bol da u Kynsaibor Lhuid ha kaba ka kynhun ka la ïoh ban lamkhmat da 1-0.
Ha ka kylla miet, u Brolington Warlarpih u la ïoh ban shut ïa ka free-kick napoh box. U rangap kol jong ka Langsning u Lambhamiki Lamare u la ïaleh katba lah ban kyrda ïa ka bol sharud, hynrei u khlem lah ban leh eiei ha kaba ka bol ka la leit poi ha u Donlad Diengdoh uba la thep shapoh kol ha ka minit ïalehkai ba 63.
Ha ka minit ba 77, u Warlarpih u la ïoh ban shut sa kawei ka free-kick hapoh box jong ka Langsning bad u Lamare ha kane ka khyllipmat ruh u khlem lah ban teh lakam ïa ka bol, kaba la poi ha u Robert Khongriah uba la thep suk shapoh kol. Lyngba katei ka nam jop, ka Mawlai ka la lamkhmat ba nyngkong na ka Group A da kaba khur 6 point.
Haba phai sha ka jingïalehkai ha Jowai, ka Rymbai Iawpynsing ka la lamkhmat arsien ban thep kol pyrshah ïa ka Ladthadlaboh hynrei ka Ladthalaboh ka la ïakhun tyngeh haduh ba ka la khur syndon ïa ka jingjop na ka Group B da kaba pynliem da 3-2 ha ka jingïalehkai ha Kiang Nangbah Stadium.
Ka Rymbai ka la shah ai penalty hadien ba u rangïalehkai u la kum pyndei da ka kti ïa ka bol, bad u Heismiki Rymbai uba la shim ka jingbahkhlieh khlem da artatien u la pynrung suk ïa ka bol hapoh ka jar ha ka jingïalehkai kaba dang ïaid 2 minit.
Ka Ladthadlaboh ka la hap ban ïakhun tyngeh khnang ban lait na ka jingshah rem bad dei ha ka minit ba 27 ka la wan urlong lyngba u Teibokmi Lyngdoh uba la thep ïa ka kol pynïakhaid. Ka jingïalehka ka la nang shongshit bad ïakhaid bha hapdeng kitei ki ar tylli ki team, ha kaba h ha kane ka jingïalehkai ki la don haduh lai tylli ki jingshut penalty, hynrei baroh lai tylli ki khlem lah ban pynrung.
Hapdeng ka jingïalehkai kaba mar ïakhaid bha, u Heismiki u la ïoh ban thep sa ïa ka shi kol ha ka jingïalehkai jong ka minit ba 79, hynrei u Thinkwell Bareh jong ka Ladthadlaboh ha ka minit ïalehkai ba 88, u la thep ïa ka kol pynïakhaid da 2-2 kol.
Ka jingïalehkai kam pat shym la kut, ha kaba baroh arliang ki la ïakhun tyngeh ban ïoh thep kol, hynrei dei ha ka minit ba la ai tam (90’+3), u Phrangsngi Pakem u la thep ïa ka kol pynjop da kaba sangah da ka khlieh ha kaba ka kynhun jong ka Ladthalaboh ka la khu jingjop. Lyngba katei ka jingjop ka Ladthadlaboh ka la ïaryngkat point bad ka Rangdajied United da 7 point, hynrei ka Rangdajied United ka don ha ka kyrdan ba kham shalor na ka jingïapher ha ka liang ka jingïoh thep kol.
Na ka Group D, ka jingïalehkai ka long kaba mar ïakhaid hapdeng ka Chipakkore bad Khliehmawlieh ha kaba baroh ar ki team ki la ïakhun tyngeh, hynrei ha kaba khatduh ka Khliehmawlieh ka la khur ïa ka jingjop.
