Nongstoiñ, Nailar 30: Na ka bynta ban kyntiew bad kham pynbha shuh shuh ïa ka kam ri khñiang kum u khñiang ryndia, khñiang muga, bad khñiang rusom ka ophis jong ka District Sericulture Officer West Khasi hills ha ryngkat ka jingïatreilang bad ka Muga ERI Silkworm Seed Organisation Mendipathar North Garo hills kaba hap ha ka jingpeit jong ka jong ka Ministry of Textiles jong ka sorkar pdeng lyngba ka Central Silk Board ha kane ka sngi saitjaiñ ka 29 tarik Nailar ka la khot ïa ka jingïalang ba kyrpang ïa baroh ki nongri khñiang na ka thaiñ Maweit West Khasi hills na ka bynta ban pyshai ha ki ïa ka rukom ri khñiang kaba thymmai.
Ha katei ka sngi la pynlong ïa ka jingïakynduh lang ha ka ïng dorbar jong ka shnong Maweit ha kaba la pynïaid da ka kong Pdianghun Warjri District Serirticulture Officer West Khasi hills.
Ka jingthmu ba kongsan jong katei ka jingïakynduh lang ka long ban pynsgewthuh ïa ki nongri khñang ïa ki buit kiba thymmai khnag ba ka jingpynmih ïa ki sop khñiang kan kham kiew namar ka jingdon kam ka long kaba bunbad ka don ruh ka jingdawa kaba jur bha na ki karkhana thir ksai kiba don ha kylleng ki bynta jong ka ri.Nalor kata katei ka jingïalang ka long ban pynshai ïa ki nongri khñiang ba uwei uwei u nongri khñiang u don kam ban thung shispah tynrai ki dieng kiba dei ban aibam ïa ki khñiang da ki sla.
Ka kong Warjri haba ai jingpynshai ha katei ka sngi ka la pynshlur shuh shuh ïa ki paitbah nongshong shnong ban phaikhmat sha ka kam ri khñiang namar ka dei ka kam kaba myntoi shibun ha ka ïoh ka kot.
Shuh shuh ka jingïakynduh lang ha katei ka sngi ka long na ka bynta ba ïathir bad ïaphylliew jingmut ryngkat ki nongri khñiang ha kaba ïadei bad ka jingpynkhreh jong ka sorkar pdeng ban kyntiew shuh shuh ïa ka kam ri khñiang lyngba kawei ka thong lane ka Develoment Plan ka Mera Resham Mera Abbhimaan 2.0. (MRMA 2.0) kaba long ruh ka plan kaba thymmai na ka bynta ban kyntiew ïa ki nongri khñiang ha katei ka thaiñ bad ha West Khasi hills district baroh kawei.
Ha kaba ïadei bad ka jingthmu ban pyntrei kam ïa katei ka Development Plan lyngba ka MRMA 2.0 la ïoh ïa ka jingbatai kaba bniah na u M.Majumdar Saiantist C ha ryngkat ka jingpyni ïa ki jingpynshai ba kat kum ka jinglong jong ka suiñ bneng bad ka jingshit jingkhriat ka thaiñ Maweit ka dei kaba biang bha ban ri ïa u khñiang ryndia, muga bad rusom kumta ka don kam ïa ki nongshong shnong ba kin ïoh ïa ki jinghikai kiba bniah kumno ban ri ïa kitei ki jait khñiang bad lada ki la ïoh ïa ki jinghikai kiba biang kan long ka jingkyrkhu ïa ki bad kan kyntiew ruh ïa ka ïoh ka kot bad ka kamai kajih jong ki bad ka thaiñ, baroh kawei.
Ha kajuh ka por la pyninuksa ruh ïa ka rukom rah ïa ki khñiang shuwa ba kin sop bad kumno ban sei haba ki la sop.Ha kajuh ka por la pyshai ha kaba ïadei bad ka rukom sumar ha ka por ba ai bam, ka rukom pynkhiid ïa ki sem ba ri ïa ki khñiang khnag ba kin lait na ki kynja jingpang kiba ktah ïa ki.
Khatduh eh la ïoh ïa ka jingiaphylliew jingmut hapdeng ki nongri khñiang ha kaba ki la pynpaw ba ka kam ri khñiang ka dei ka kam kaba eh hynrei lada trei shitom ka long pat ka kam kaba ïoh nong bha.
