Lada ïa ka skul class 1 haduh ka class ba 12 hap pan na ka Shree Cement, hato don jingmut ban don MLA/MDC ha EJH?

K a sorkar MDA jong U Conrad Sangma, ka la dei ban kren shai halor ka mat jong ka Shree Cement bad kata ka long, la ka kwah ban plie ïa kane ka karkhana dewbilat lane ka kham donkam ïa kine ki kynhun sengbhalang, kiba la ïakhih tyngeh mynta la bun bun bnai ban khang ïa kane ka karkhana dewbilat ka ban treikam ha Lum Syrman, East Jaiñtia Hills jong ka elaka Nongkhlieh.
Na ka jubab jong U Dolloi katei ka Elaka, haba u wan kren sha ki kotkhubor, ha ki khyndiat sngi ba ladep, ula pyni, ba u kwah ïa ka skul naduh Class I haduh Class XII ban ai da katei ka kompeni bad katei ka jubab, ka dei ka bym shoh satia haei haei ruh, namar katei ka pyni, ba ka jingjied nongmihkhmat jong katei ka Elaka lane ka jingdon ka sorkar Meghalaya ka long pleng ka bym don jingmut ne jingmyntoi eiei ruh em, lane ba ka sorkar Meghalaya, kam ithuh ïa ka jingdon jong katei ka shnong ha ka map jong kane ka jylla, ba ka donkam ban leit pan jingïarap na ka kompeni, na bynta ban pynïoh skul.
Ban shu leh mynthi ha kane ka dur, ka long ka bym lah satia ban pdiang, namar ba kumno kan shu mih kawei ka seng, sa kawei pat ban pynlong jingïakhih, ban pynlong jingshah thngan pyrshah ïa katei ka kompeni dewbilat, lada kam don ka daw kaba shisha bad ïa kane lah ban ïohi, ïa ka sengbhalang Jaiñtia National Council (JNC), nangta ka Jaiñtia Students Union (JSU) bad mynta sa ka Khasi Students Union (KSU). Kim dei tang ki sengbhalang, hynrei la ïohi, ba ki don shibun kiwei pat ki sengbhalang, kiba don bynta lang ban pyrshah ïa katei ka karkhana dewbilat.
Kumba ka paw ha ki rynsan social media, la ïohi bad kynnoh ruh ba ki kompeni dewbilat, ki ju bei pisa bha sha ka seng NPP, kaba dei ka seng synshar ïa ka jylla, hynrei kaba kongsan ka long ba ka pisa kam dei tang ka lynti ban jop elekshon, hynrei kum ka seng saiñ pyrthei, ka dei ban peit kham jngai, na bynta ka lashai jong ki nongshong shnong jong ka East Jaiñtia hills, namar ba katei ka thaiñ, ka la dap da ki karkhana dewbilat suda.
Ka por ka la dei ïa ka sorkar jylla, ba kan pyrkhat jylliew ïa kane ka mat, da kaba peit jngai ïa ka jingktah jong ki karkhana dewbilat sha ka thaiñ East Jaiñtia hi baroh kawei bad ka dei ban don ka jingsngew briew ruh, ba lada ka sngew ïahab ne em ban shu bom shu tied briew, kumba ka long ïa ki nongïalam KSU ban set phatok ha ki kyndon MPDA bad nangta ban pynjot ïa ki surok kali, ban khanglad ïa ki paidbah ban leit sha ka jingïathir nia, halor ka mat ban plie ïa katei ka karkhana dewbilat. Hynrei lada ka sngewdei pynban ban ñion da ka bor ban pynsngap jar ïa kiba pyrshah, kumta katei ka pyni shai ïa ka jingmut kaba don ha ki nongïalam jong kane ka sorkar MDA.
Kumba la ïohi na ka jingdon bun kiwei pat ki karkhana pynmih dewbilat bad khlong mawshun ha ka thaiñ Jaiñtia Hills District bad kiwei la ïohi kumba kine ruh ki karkhana ki kwah ban ïadonlang ha kum kine ki jingïakhih na ka bynta ka jingmyntoi jongno re jongno namar la sngewthuh ba ha ka business ne ki kam khaïi baroh baroh ki ïa kwah kamai spah jubor ne ban ym lad kawei ia kawei pat kumta kin pyndonkam beit da kiba bun ki lad ki lynti ban ïoh kurup ïa ka spah ka phew bad kumjuh ruh ban pynjot ïa ka mariang bad khamtam eh ïa ka ioh ka kot, ka kamai kajih ki nongshong shnong bad khamtam eh ban ïuhroit bad ban knieh jubor ïa ki jaka na ki trai jaka, watla ki tip bha ba ha Jaiñtia ka don ka Jaiñtia Hills Autonomous District Council kaba ri ba sumar bad ba ïada ïa ka khyndew ka shyiap jong ki nongshong shnong katkum ka bor ba la ai bad pynkhamti hapoh ka khyrnit kaba 6 jong ka riti synshar paidbah jong ka ri India.
Haba phai pat sha ka jingshah kem ki dkhot ka KSU ba kynthup ïa u President, Vice President bad u General Secretary bad u Organsing Secretary ka long kaba phylla bad katba ka jingtohkit ka dang iaid bad ym pat lap ïa ki jingshisha ha kano ka rukom bad ki kyndon jong ka aiñ ba na ka liang ka sorkar ka lah bad don hok ban pynngat hapoh ka aiñ Meghalaya Preventive Detention Act (MPDA).
Lah ban pynkynmaw na ka jingïakhih ka KSU bad kumjuh ka jingïaid paidbah ka seng saiñ pyrthei riewlum ka Voice of the People Party (VPP) lehse lah ban ong ba ka sorkar ruh ka la hap ban pyrkhat ïa baroh ki jingdawa kiba long kiba kongsan na ka bynta ka jylla bad kumjuh ruh kaba kiba bun ki nongshong shnong ki la pynpaw lyngba ki rynsan khubor paidbah ne Social Media ba ka sorkar kadei bad ka donkam ban sngap bad bishar bniah bha ïa ki jingkwah bad jingdonkam jong ki nongshong shnong ha kane ka jylla.