Mairang, Nailur 18 : Ka um dih ka dei kaba don kam haduh katta katta ïa uwei pa uwei u nongshong shnong u don kam ban dih um. Haba phai shaphang ki um ki don ki um kiba ki paitbah ki ïoh na ki um kor kiba la ring ha ki shnong ki thaw bad ki ïing ki sem na ki jaka ba jngai da kaba pyndon kam da ki pipe nar bad pipe jri ruh kumjuh.
Nalor kata ki don ki um kiba shu tong na ki shyngiar bad ki pung tong um ba la shna khnang hynrei ïa ki um kiba ïoh na kitei ki bynta ym ju kham don koit kiba pynïaid ïew ha kylleng ki bynta jong ka jylla. Kaba sngewtynnad ka long ba na ka bynta ban pynsuk ïa ki paitbah ha ki shnong ki thaw bad ha ka leit ka wan uweiu rangbah na ka shnong Kynshibangla uaba la tip klyrteng kum u bah Wenri Marweiñ u la shna ïa kawei ka karkhana pynmih um dih kaba u la ai kyrteng “Umrupa” ha ka jaka kaba la khot Mawteijrong kaba hap hapoh u pud u sam jong ka shnong Kynshibangla kaba don harud ka surok bah National Highway 44 (E) Shillong – Tura.
Ïa ka um ba la pynmih ha katei ka karkhana la thep lypa ha ki bilor kiba la seal bha sbak mar shu dep thep bad la buh lang ruh ban ka kyrteng. Katei ka um ka dei kaba bang haduh katta katta ban dih bad uwei uwei u bilor udei u ba ngiam shi litre ka um. Ha ka jingleit ïa kynduh jong u nongthohkhubor jong u Mawphor ïa u bah Wenri Marweiñ u trai jong katei ka karkhana la ïoh ban ïakren sani bha bad u ha kaba u la ïathuh ba katei ka karkhana pynmih um ka la kynjoh mynta shiphew snem kynthih naduh ba u la sdang.
U Bah Marweiñ u la ïathuh ruh ba ha ka shi sngi katei ka karkhana ka lah ban pynmih kumba hynñiew haduh phraspah song ka um kaba la thep lypa ha ki bilor ha kaba ha ka shi song ki don arphewsw tylli ki bilor um bad lada kheiñ lang ka long khatkhyndai hajar arspah bilor lah ban pynmih ha ka shisngi. Nalor kata u la ïathuh ruh ba ki nongtrei ha katei ka karkhana pynmih um ki don palat hynriewphew ngut .nalor kata u la ong ba ka ïew ka hat ka long kaba biang bha namar ka dor jong ka um ha uwei u bilor ka shong dor tang shiphew tyngka kumta ki briew ki ïabeh bha ban thied.
Nalor kata u bah Marweiñ um shym la pynkut tang ha ka karkhana pynmih um dih hynrei mynta u la shna sa kawei pat ka karkhana shna sabon . Ha kajuh ka por u la ong ba ïa ka sabon ba la shna ha katei ka karkhana u la ai kyrteng ka “Mon Sabon”. Ha kajuh ka por um la ong ba katei ka sabon ba la shna ha katei ka karkhana ka dei kaba rem dor bha bad ka dei ruh ka sabon kaba bha tam na baroh ki jait sabon kiba thied na ïew na hat. U la ong ruh ba ka rukom pynïaid ïew ïa katei ka sabon ka biang bha bad shi sien ba la pynmih kam ju sahkut satia.
Ha kajuh ka por u la ong ba ka jingshna sabon ha katei ka karkhana ka la ïaid mynta la shi snem tam bad katba nang mih ki sngi ka jingdawa ka nang bun bad un pyrshang ban kham pynheh shuh shuh ïa katei ka karkhana. Nalor kata u la ong ruh ba mynta un sdang ban shna sa kawei ka karkhana shna prek bad ka jingpynbit pynbiang ïa katei ka karkhana shna prek ka dang ïaid shait shait bad kan ym slem shuh ba un sa plie ban pynytrei kam noh ïa ka. Haba kylli pat ba katno ngut ki nongtrei ha kitei ki karkhana ki don u la ïathuh ba baroh ki nongtrei ha ki karkhan jong u ba kynthup naduh ki karkhna shna kali, karkhana tylliat maw bad kiwei kiwei haduh mynta ki la don kumba shispah tam.
U la ong ruh ba katei ka jaka ba ka karkhana pynmih umdih bad ka karkhana shna sabon ka dei ka jaka jong u shimet bad ka jingheh ka don kumba arphew akar bad ha katei ka jaka kin dang don shibun ki karkhana ban shna ïa kiwei kiwei ki jait tiar ban pynïaid ïew na ka bynta ka jingdon kam ki paitbah bad kin dang don shibun bah ki nognshong shnong kiba un aikam aijam ha kitei ki karkhana.
