Ladep ban pynbeit ia ka jingïakajia halor ka jinglum khanasamari ha Langpih: Bah Prestone

Shillong, Nailur 18 : Ka jingïakajia kaba mih halor ka jingkynnoh ba ka jylla Assam ka la pynlong ïa ka jinglum khanasamari ha Langpih, kaba dei ka jaka jingïakajia ha khappud Meghalaya-Assam, ka dei kaba la dep ban pynbeit, ong u Symbud Myntri Rangbah ka jylla uba peit ïa ka tnat Home (Police), Prestone Tynsong.
Haba kren bad ki lad pathai khubor, u Bah Prestone u la ong, “ Ia kane la dep ban pynbeit. Ha ki jaka ba ka sorkar jylla ka la dep pynlong ïa ka khanasamari, ngi la ïakren bad ki bor ba dei peit jong ka Assam ba kim dei ban pynthut ïa kata, bad ki la leh kumta.”
U la ong ruh ba ka jingjia kaba kum kane kaba la mih ha Mukroh ruh bad ia kane ruh la dep ban pynbeit. “Kajuh ka mat ha Mukroh ruh la dep ban shimkhia bad pynbeit,” u la ong.
U Symbud Myntri Rangbah u la ïathuh ba la dep bthah ïa u Chief Secretary ka jylla ba un shimkhia mardor ïa kino kino ki jingujor ne ki jingkynnoh kiba mih halor ki kam kiba ïadei bad ka khappud, da kaba ïakren bad ki bor ba dei peit na Assam.
“La dep bthah ïa u Chief Secretary ba lada don kano kano ka jingujor kum kane, u dei ban shimkhia mardor bad ban ïakren bad ki bor ba dei peit na Assam,” u la ong.
U Bah Prestone u la pynpaw ruh ïa ka jingsngewkmen halor ka jingïatreilang bad ka jingkyrshan na ka liang jong ki bor sorkar Assam haba mih ki jingïakynduh jingeh ne ki sngewthuh bakla hapdeng ki ar jylla.
“Ngi sngewkmen ban ïathuh ba wat na ka liang jong ka Assam ki long kiba ïatreilang bha haba mih kum kine ki jingsngewthuh bakla,” u la bynrap.