Nongpoh, Nailar 03: Kum shi bynta ban rakhe ïa ka jingdap10 snem, ka Bethany Hospital, Nongpoh ka la pynlong ïa ka jingïakop mareh thong kaba la jer kyrteng da ka “10th Anniversary Run” ha ka step Sngi Saitjaiñ (03 tarik Naitung), kaba la khring ïa kiba bun ki paidbah kiba ïashimbynta ha ki kyrdan bapher bapher.
Ha kane ka step la don ryngkatlang u Bah Mayralborn Syiem-Chairman jong ka Meghalaya State Health Advisory Board bad ha kajuh ka por u ba dei u MLA ka Nongpoh, kum u Kongsan u ba la kaweh ïa ka lama ban sdang ïa ka jingïakop mareh, ban pynsah kynmaw ïa ka sngi ka koit ka khiah, bad ka jingïatylli ka imlang ka sahlang.
La wan ban pynshlur ïa kane ka jingïakop mareh da ki nongïakop mareh ba la rangbah, kum i Mei ieid Kmoin Wahlang, nangta ka Darishisha Iangjuh, kiba la long kum ki Race Ambassadors.
Ha kane ka jingïakop mareh thong (marathon) la phiah ha ki kyrdan bapher bapher, ba kynthup ïa ka jingmareh kaba 10 Kilomitar bad kawei 5 Kilomitar, ban pynïahap katkum ka snem jong ki nongïashimbynta. Nalor kata, ha kane ka jingïakop la pyndonkam ruh da ki kor peit por lane ki RFID timing chip ba la pynbiang da kawei ka kompeni na Delhi, ban pynshisha ïa ka por kaba thikna ïa baroh ki nongïashimbynta ynda ki la pyndep ïa ka jingmareh.
Ïa ki nongjop ha kawei pa kawei ka kyrdan la sam da ki khusnam pisa, ki syrnot bad ki takma kum ka dak ban pyni ba ki long ki nongjop. Nalor kata, kum ka jingithuh ïa ka jingwan ïashimbynta bad pyllait por jong ki, baroh ki nongïashim bynta kiba pyndep ïa ka jingmareh ki la ïoh ïa ka takma bad ka sertiphiket, kaba la pynlong ïa kane ka jingïakop kaba sah jingkynmaw na ka bynta baroh kiba wan ïashimbynta.
La sam ruh ïa ki khusnam ba kyrpang sha ki nongïashimbynta kiba dang khynnah bad kiba la rangbah tam. Ha kaba kut, ka Bethany Hospital Outreach, Nongpoh ka la ai khublei ïa baroh ki nongïashimbynta kiba la pynlong ïa kane ka jingïakop mareh kaba seisoh.
