Rai ka Sorkar ban pyrkhing noh ïa ïa ki nongbylla ba wan nabar jylla

Shillong, Nailar 02: Hadien ka jingkhynra nongbylla bar jylla kaba la jan shi bnai da ki Sengbhalang bad khamtam ka KSU, ka sorkar jylla mynta ka sngi ka la rai ban pyrkhing noh ïa ki nongbylla nabar kiba wan bylla shane.
Ïa kane ka rai la shim ha ka jingïalang jong ka Kynhun Myntri kaba la long mynta ka sngi.
U Bah Paul Lyngdoh, nongaiktien jong ka Sorkar, u la ïathuh ba kane ka jingpyrkhing ka long da kaba pynkhlaiñ ïa ka jingtreikam ka MRSSA, lyngba ka Meghalaya Indentification Registration Safety and Security of Migrant Workers bad ka Meghalaya Identification Registration Safety and Security of Migrant Workers Rules 2020 ha kaba yn nym shah shuh ïa ki nongbylla na shabar kiba don ki dak sniew ne ki criminal record ba ki wan bylla shane. U Bah Paul, u la ïathuh ba ïa kane yn pyrkhing lyngba ka system kaba ka la don lypa bad ki Pulit.
Kawei pat ka rai ka long ban wanrah da ka amendment halor kane ka aiñ kaba la mynjur ha u snem 2020, ha kaba kino kino kiba pynkheiñ ïa ka aiñ ne ïa ki kyndon, yn shaiñ kuna noh 1 lak tyngka, ym shuh 5 hajar kumba don ha ki kyndon kiba rim. Nangta lada don pat kiba pynkheiñ biang ïa ki kyndon palat ïa ka shisien, yn set phatok ïa ki lai bnai.
Lah ban kdew hangne ba ka KSU ha ka 6 tarik u bnai baladep bad kiwei de ki Sengbhalang, ki la pynlong ka jingkhynra ïa ki nongbylla bar jylla ha kylleng kylleng ki jaka jong ka Ri Khasi Jaiñtia ha kaba da ki hajar ngut ki nongbylla bar jylla ki la phet noh sha la shnong namar kane ka jingshah khynra.
Lah ban kdew hangne ruh ba kiba bun ki nongïalam jong ka KSU ki la shah khot hajir ha ki Pulit ha kaba ïadei bad kane ka jingkhynra nongbylla bar jylla, namar ka sorkar ka ong ba kam dei kamram jong ki ban khynra, hynrei kadei ka kamram jong ka Labour Department.