Shillong, Nailar 2 : U Schistura sonarengaensis u dei u dohsher syngkai ba ka pyrthei saians kam pat tip tad haduh ba u Dr Khlur Mukhim bad ki paralok scientist jong u ki la pule bniah bad batai ïa ki jinglong ba kyrpang jong une u sher syngkai ba la tong nuksa napoh ki lai tylli ki krem ha South Garo Hills, Meghalaya (Krem Sonarenga, Krem Nakama bad Krem Chiabol). La ai kyrteng Latin ïa une u dohsher na ka kyrteng jong kawei na kita ki krem, ka krem Sonarenga, kaba don kumba 10KM sharum na ka Krem Siju ha ka lynti kyndong ban leit sha Baghmara. Ki jingbun bad rukom thoh-iong ki snep jong une u dohsher bathymmai ki kham pher na kiwei pat ki dohsher ba marjan ïa kiba ki saiantis ki la batai ha ki snem ba la dep, kum u Schistura sijuensis (na Krem Siju, South Garo Hills, da u Ambat Menon, 1987) bad Schistura syngkai (na Twahdidoh ka Ri Lyngngam, da u Khlur Mukhim, 2019). U Dr Mukhim u da sngewnguh eh ïa u Milton M.Sangma bad ki paralok jong u kiba la ïarap shibun ha ki jingleit rung krem jong u ha ki Lum Garo.
