Shillong, Nailar 2 : Ka jingïakob thei bhabriew ban ïoh rah ïa ka pansngiat Miss Meghalaya 2024 bad Miss Teen Meghalaya 2024 kan long mynta ka sngi 3 tarik Nailar ha ka por 4.30 janmiet ha Lariti Multipurpose Hall Mawkasiang. ïa kane ka jingïakob la pynlong da ka Meghalaya Tourism bad ka tnad Arts and Culture jongka sorkar jylla.
U Myntri Rangbah ka jylla u Conrad K Sangma un long u kongsan katba u myntri ka tnad kam jngohkai, Arts and Culture bad Textile u bah Paul Lyngdoh un long u symbud kongsan.ïa kane ka jingïakob la kyrshan ruh da ka Atomy India kum ka Beauty Patner bad Lakme Academy Shillong kum ka Makeup Patner.
Mynta u snem ki don 38 ngut ki nongïashim bynta kata 19 ngut na ka bynta ka Miss Meghalaya bad 19 ngut na ka bynta ka Miss Teen Meghalaya 2024. Kaba jop ïa ka Miss Meghalaya 2024 kan ïoh ban leit ïakob sha ka rynsan Miss Universe India 2024 bad kaba wan ba ar kan mihkhmat ïa ka Meghalaya ha ka Miss Northeast 2024. Kaba jop ïa ka Miss Teen 2024 kan leit ïashim bynta ha ka Miss Teen Deva 2024 ha Jaipur.
Kane ka jingïakob kan long kaba itynnad bha namar ki nongïakhun kin pyni ïa ki riam ki beit, ki sap ki talen jongki bad kumjuh ruh ïa ki jngriam tynrai. Na kata ka daw wat ym pep ban leit sha katei ka jingïakob ban sakhi mano ban ïoh rah ïa ki pansngiat bhabriew tam.
