Da ka jaka sumar bad ïasyllok sdang ‘Ka Sur Jingkyrmen Society’ ha Nongpoh

Nongpoh, Jymmang 22: Kum shibynta ban ïarap ïa ki briew kiba la kyrni haka jingdih pynbuaid kiba kynthup naduh ka kyiad, u drok bad kiwei kiwei bad kumjuh ruh ban ai mynsiem ïaki briew kiba don hapdeng ka jingduh jingkyrmen haka jingim da kaba ai ka jingïasyllok bad jingsumar kaba kyrpang, ka kynhun jong ka Sur Jingkyrmen Society mynta ka sngi ka la ïoh ban plie paidbah noh ïaka Treatment and Counselling Centre ha Nongpoh Town Shoping Complex.
Ïa katei ka jaka ïasyllok ne Treatment and Counselling Centre la wan ban plie paidbah da u Bah Mayral Born Syiem MLA ka Nongpoh kum u kongsan haka jingdon lang u Bah Bull Lyngdoh, Assistant Rangbah Shnong ka Nongpoh, Bah Justine Maring President Ka Sur Jingkyrmen Society, Bah Neil J Khongwir, General Secretary, kong I Kshiar, Vincent Lynthong kiba dei ki dkhot jong ka society lem bad kiwei kiwei.
U Bah Neil J Khongwir, General Secretary ka Sur Jingkyrmen Society u la ïathuh ba ka jingthmu jong ka kynhun ban sdang ban buh ïa katei ka jaka sumar bad ïasyllok ka long ban ïaleh pyrshah ïaka jingkynrei jong u drok hapoh ka District, kumba bun naki khun samla naduh kiba dang rit ka rta kila sdang ban dung thyrñia ïalade bad ngop ha u drok.
U la ïathuh ruh ba dei halor kane ka bynta kane ka kynhun ka la ïoh ban plie mynta ka sngi ïa kane ka center ka jaka ban ai jingsumar bad jaka syllok ha ka dor kaba duna bad u la ïathuh ruh ba lyngba kane ka center ba ki don ka jingkyrmen ba shisien ka sngi kin ïoh ban plie ïaka jaka ai jingsumar kum ki Rehabilitation Centre naka bynta kito ki ba la kyrni haka jingdih buaid.
U la ïathuh ruh, ba kane ka center kaba la ïoh ban plie mynta ka sngi kan ai ka jingsumar ïakito ki ba ngat haka jingkyrni ha u drok bad ha kiwei kiwei ki jingdih buaid haka dor kaba rit. U la ïathuh ruh ka dor jong ki ba bun ki jaka ai jingsumar ïa kiba la kyrni ha u drok kiba don sha kiwei pat ki jaka ki long ki ba rem bad ka kot shaduh ka 30 lane 40 hajar tyngka bad bun ki longïing ki ba wan naka longïing kiba duk kim lah ban phah sha kum kine ki jaka ai jingsumar.
Ka jingthmu jong kane ka Center kaba la ïoh ban plie mynta ka sngi ban buh ïaka dor kaba rit ka long ba khnang ba ki longïing kiba duk kin ïoh ban phah sumar lane ban ai ka jingïasyllok dakaba bynrap ruh ba lyngba kane ka jingthmu jong ngi, ngin lah ban ban wan rah ïaka shongsuk shongsaiñ haka imlang ka sahlang bad ngin lah ruh ban wan rah ïaka jingkylla haka jingim jong kito kiba la ngat haka jingkyrni haki jingdih kiba sniew khamtam ban rat diengkhong ïaki jingdoh buaid.
U Bah Mayralborn Syiem, haba kren ha katei ka jingïalang kum u kongsan, u la ong ba kam kong ka ba suk ban sdang ïa kano kano ka kynhun ka ban trei mon sngewbha naka bynta ban shakri ïaka imlang ka sahlang, khamtam eh ban sdang ïaka kynhun ka ban peit bad ban trei mon sngewbha naka bynta ban ai ka jingïasyllok ïa ki briew kiba don hapdeng ka jingduh jingkyrmen. Hynrei u la ai ka jingkhublei kyrpang ïa kane ka kynhun jong ka Sur Jingkyrmen kaba la shim ïa kane ka bynta kaba khraw ban leh ïaki kam kiba bha tam ba ka imlang ka sahlang ka donkam eh.
U la ai ka jingkitbok kitwriang ïa kane ka kynhun ba kan lah ban treibha ïa ki kam katkum ka jingthmu ka jong ka katba ki sngi bad ki por kin dang ïaid. U Bah Mayralborn u la kyntu ruh ïaki nongïalam jong ka kynhun ba kin don ka ïa trei ryngkat bad ki lai tylli ki tnad treikam jong ka sorkar naduh ka tnad pulit, Social Welfare bad ka tnad ka koit ka khiah kiba long ki tnad treikam kiba ha khmat eh kiba trei ïa ka kam ba kane ka kynhun jong ka Sur Jingkyrmen ka thmu ban trei.
Shuh shuh u la pynpaw ba ha kine ki sngi ka jingshah thombor jong ki heprit ka la jur bha bad ka jingjyllei jong u drug ka la sam sha ki ba bun ki shnong bad ki khun samla bad la bun ki longïing ki jot la pra tang na ka daw jong u drok. Haka ba ïadei bad kane u Bah Mayral u la kyntu ïaki nongïalam jong ka kynhun ba kin peit lem ïa kane ka jingeh da kaba ai ïaka jingïasyllok sha kito ki heprit bad ki khun samla kiba la ngat ha kane ka jingeh khnang ba kin lah ban ïaleh pyrshah ban pynduh pyndam ïa u drug bad ki heprit ki ba don pdeng ka jingduh jingkyrmen kin ïoh mynsiem bad don ka thong haka jingim jong ki.