Sospon ka KJPHSS da shitaiew ïa ka jingpynlong skul hadien ba bam duh ka ding ïa ka ïingskul

Shillong, Jymmang 22: Ka Khasi Jaiñtia Presbyterian Higher Secondary School (KJPHSS), Shillong ha ka Lah Sngi u Blei ka la pyntip ba la rai ban sospon da shitaiew ïa ka jingpynlong skul bad ba na ka liang ki bor pynïaid jong ka skul kin sa pyrkhat ïa ka sienjam kaba ki dei ban shim ha kaba ïadei bad ka jingpynlong skul biang.
Haba kren sha ki lad pathai khubor uwei na ki nonghikai katei ka skul u Babu Kular Khongjirem u la ïathuh ba na ka liang ki bor pynïaid kin shong pyrkhat ïa kiei ki sienjam kiba kin shim ha kane ka shi-taïew ha kaba ïadei bad ka jingpynlong skul biang ïa ki khynnah skul.
“Ka ding kaba klang ha ka step phyrngap jong ka sngi u Blei ka la bam duh ïa ka ïingskul ba ju shim klas ïa ki khynnah klas 6 haduh klas 10 bad na ka liang ki bor pynïaid skul bad ki nonghikai ngin wad ïa ki lad la ban pynlong skul shawei ne ngin leh da ki online class ne da kino ki sienjam ngin shim,” u la ong.
“Ngi kyrpad rit ïa ki khynnah skul ban shah shitom lang bad ngi ha kane ka por ba ngi mad ïa ka lanot bad ngi kwah ruh ban ai ka khubor ba ha kaba ïadei bad ka eksamin shiteng snem kan ïaid beit kumba la pynbna naduh kine ki sngi kiba la leit,”ong ka Vice Principal jong kane ka skul.
Lah ban kdew hangne ba ha ka step phyrngap jong ka sngi U Blei ka ding ka la bam duh ïa ka ïing skul jng ka Khasi Jaiñtia Presbyterian Higher Secondary (KJPHS) ba ka la ïeng rasong ban shakri kum ka shlem ban saiñdur ïa ka jingnang jingstad jong ki khun kynthei ka jylla tang shikyllipmat kane ka skul ka la kylla dpei noh namar ka ding kaba klang ka la bam duh ïa kane ka skulha ka por hapdeng ka 1.30 bad 2 baje ei ei dang step phyrngap.