Bthah ka HC ïa ka Sorkar ban lum jingïalang hapdeng ka Jowai  Municipal bad ki Waheh Shnong

Shillong, Jymmang 22: Ka High Court of Meghalaya (HC) ha ka lah Sngi u Blei ka la bthah ïa ka sorkar jylla ban khot da ka jingïalang hapdeng ka ka Jowai Municipal Board bad ïa ki Waheh Shnong ka sor Jowai na bynta ban wad ïa ki lad ki lynti ha kaba ïadei bad ka jinglum ïa ki ñiut ki ñier ha Jowai.
Haba shong bishar ïa ka PIL ba ka ujor da ka Synjuk Ki Waheh Shnong Jowai, ka kashari jong u Chief Justice ka HC u Justice Sanjib Banerjee bad u Justice W Diengdoh, ka la btah ba ka sorkar ka dei ban lum ïa kane ka jingïalang na bynta ban weng ïa ka jingeh kaba mih ha kaba ïadei bad ka jingpynkhuid ïa ki ñiut ki ñier ha Jowai.
Ha ka affidavit ba la file da ka Jowai Municipal Board ka la pyntip sha ka HC ba na ka liang jong ka ka la pynbiang ïa ki kali ban kit ñiut kat kum ki sngi kiba la buh bad ka la pyntip ruh ba ka la pynmih ïa ka hukum ha kaba ïadei bad kane. Ka Municipal Board ka la pyntip ruh ba kine ki kali kit ñiut ki tista ha ka jingleit kit ha ki sngi ba la buh.
Katba na ka liang ka synjuk lyngba u General Secretary lyngba ka affidavit sha ka kashari u la pyntip ba ka jingkam ka Municipal ba ka don ka jingtista na ka liang ki kali kit ñiut ban wan lum ban lang ïa ki ñiut ki ñier ka long kaba bakla namar kam don satia ka jingbud pyrkhing ïa ka por kumba la pynmih da ka Municipal Board na bynta ban wan lu ñiut bad ka la kam ruh ba ki don ki jaka kiba ki kali kit ñiut ki poi tang arsien shibnai bad ki don ki jaka lei kiba ym ju don satia kano kano ka jingwan lum ñiut.
Na ka liang ka sorkar jylla bad ka Municipal Board ka la pyntip sha ka kashari ba ka la don ka whatsapp group kaba la thaw ha kaba don lang ki Waheh Shnong khnang ban lah ban ai kino kino ki ujor lada kam don ka jingwanlum ñiut ‘hynrei kat haduh mynta ym pat shym la ïoh wat kawei ruh ka ujor,’ ki la pyntip.
“Ka sorkar jylla ka dei ban khot ïa kane ka jingïalang, bad ka sorkar jylla lyngba ka ophis u Deputy Commissioner ba ka dei ruh ban pynthikna ba hukum ba la pymih da ka Municipal Board ha ka 17 tarik Lber 2023 dei ban bud ryngkhi,” ong ka kashari.
“Kino kino ki junior officer na ka ophis u Deputy Commissioner ki lab ban pynlong ïa ka jingjurip ba kyndit kyndit bad ban aiti pat sha u Deputy Commissioner ïa ka kaiphot khnang ba u Deputy Commissioner un lah ban aiti ïa ka kaiphot sha kane ka kashari ynda ngi shim bishar biang,” ong ka hukum.
Na ka liang ka ka kashari kan sa shim bishar biang ïa kane ha ka 7 tarik Jylliew.