Shillong, Jymmang 22 : Ka sorkar jylla Meghalaya ryngkat ka jingïatreilang bad ka tnad Ministry of Development of North Eastern Region (DoNER), ka la pynlong ïa ka Investors Roundtable ha nongbah ha ka Sngi Thohdieng. Ka jingthmu jong kane ka lympung jingïalang ka long ban ailad ïa ki nongbei tyngka ba kin tip shaphang ki kam kiba ki lah ban bei tyngka ha Meghalaya bad ka thaiñ shatei lam mih ngi. Ki riew paw khmat na ki tnad sorkar, ki nongïalam ha ka liang ki karkhana, bad ki nongbei tyngka ki la ïadonlang, bad pynlong ïa kane ka jingïalang kaba jop. ïa kane ka jingïalang la pynlong ryngkat ka jingïatreilang bad ka FICCI (Industry Partner), EY (Knowledge Partner), bad ka Invest India (Investment Facilitation Partner).
U Harpreet Singh, R M Mishra, Pravin Bakshi, Dr.B D R Tiwari, Dr Joram Beda, bad I C.H. Kharshiing ki la thang ïa ka sharak kum ka dak jong ka jingsdang ka lympung jingïalang ba san jong ka Roundtable Conference jong ka Northeast Global Investors Summit ha Shillong, Meghalaya. La pynlong ïa kine ki jingïalang la bun tylli kaba la sdang shwa ha Assam bad nangto ka la ïaid pat sa sha kiwei kiwei ki bynta jong ka thaiñ shatei lam mihngi kum ka Tripura, Mizoram, Sikkim, bad mynta ha Meghalaya. Haba pdiang sngewbha ïa ki nongbei tyngka, I Bah D. P. Wahlang, IAS, iba long ruh I Chief Secretary, I ong, “Ryngkat lang bad ki jingtei kiba bit ba biang, ka connectivity kaba bha, ka, jingthrang ban seng ïa ki kam lajong, bad ka jingangnud jong ka sorkar ban ai jingkyrshan, kan ai mynsiem bad pynshlur ïa ka jingthrang ban seng kam jong bad ïarap ïa ki nong Meghalya.”
Ka Meghalaya ka paw bha kum ka jaka kaba itynnad, kaba pyngngad ka mariang, ka jingdon jong ki kshaid, ki krem bad ki kam jngohkai pyrthei ha kaba lah ban leh ïa shibun kiei kiei ha ka mariang, bad kumjuh ruh kum ka jaka jong ka put ka tem. Ka ïoh ka kot jong ka jylla ka long kaba shaniah tylli ha ka rep ka riang bad ki khlaw, kaba don ïa shibun ki dieng bad ki siej.
