Shillong, Naitung, 16: Kum ka dak ka jingrakhe ïa u snem International Year of Millet, ka ophis KVK West Khasi Hills ka la pynlong ïa ka Millet Recipe Contest 2023 ne ka jingïakob shet jingbam na u Krai kyrpang na bynta ki longkmie ha ki lai shnong ki jaka ba ki nongrep ki dang rep bha ïa u Krai da ka jingthmu ban sngewthuh ïa ki jingbam ba bun jait ba shet na u krai bad kumjuh ban pynsaphriang shuh shuh ïa ka jingkordor jong u krai ha ka koit ka khiah.
Ïa ka Millet Recipe Contest la sdang nyngkong eh ha ka shnong Mawkamoit Mawthadraishan Block ha ka 3 tarik Naitung 2023 bad la bud sa ha Mawduh Nongstoiñ Block ha ka 4 tarik Naitung 2023 bad 10 tarik Naitung 2023 ha ka shnong Langtor hajan Rangblang Mawkyrwat Block.
Ha kane ka jingïakob la ïashim bynta bun ki longkmie kumba 92 ngut ha baroh 3 shnong bad la jied tang 15 ngut ki nongjop na kine ki shnong.
Ïa ki nongbishar la jied 3 ngut kynthup u Sordar shnong, Riewtymmen ha shnong bad iwei ba trei NGO.
Ha kane ka jingïakob ki longkmie ki la shet bun jait ki jingbam na u Krai saw kum u Pusyep, Ja krai, Puthap, Putharo, Pusaw, Pusla, Krai Cake, Krai Pakoda, Krai Samosa, Krai Momo, Krai Biskit bad kiwei de.
Katkum ka jingnang ban shet bad ki kyndon ba la buh la jied 5 ngut ki nongjop na kawei ka shnong. Kine ki nongjop ki ïoh ka buskit kum ka song pisa bad ka syrnot.
La ai jingpynshai ruh shaphang ka jingkordor jong u krai ha ka bam ka dih ba manla ka sngi ba u ïarap ha ka koit ka khiah ban ïaleh pyrshah ïa ka jingpang duna snam, sngaid palat bad ka jingpang shini.
Kane ka prokram ka la ktih shisha ïa ki longkmie ba kin sei bad pynmih ïa ki sap jong ki ha ka shet ka tiew bad khamtam eh ba kin pynïar shuh shuh ka jingrep krai ha ki shnong jong ki.
La shem ba ki nongrep ki donkam ïa ki kor ban tylliat ïa une u krai bad kumjuh ruh ba kin leit pyntbit shuh shuh ban shet bun jait ki jingbam ba kan long kawei ka lad ha ka ïohkam ïohjam.
