Nongpoh, Naitung, 16: Ka St.Jude Secondary School, Umpher ha ka thaiñ Byrnihat ha Ri Bhoi District ka hap ban kynduh mawsiang man la u snem, kaba dei na ka daw ka jingshah ktah ha ka jingshlei um na ka daw bym biang ki nala um jongka surokbah National Highway-6 ha RiBhoi ha kaba tang tang shu jur u lapbah la thikna ba kin mad ïa ka jingshlei um.
Ïa kane ka jingshah ktah katei ka shlem saiñ dur jong ka jingnang jingstad ki khynnah na ka jingshlei um ka la jia ruh dang ha ka sngi Thohdieng ba ka skul ka la shah tap ha ka jingshlei kaba dei na ka jingther u lapbah lapsan.
Kane ka jingther u lapbah lapsan ka la wan rah ruh ka jingshlei ha bun bynta jongka surokbah, hynrei kaba shah ktah bha ka dei kane ka skul ba ka umsaw ka la rung shaduh ki kamra jongka skul bad kumjuh ruh sha ki jaka sah jong ki Brother bad ruh ka ïngmane ba ki shakri Blei.
Haba la ïoh ban ïa kren bad u Principal katei ka skul, u Brother Shyju PJ, u la ong ba kane ka jingshlei ka la ktah sha ba palat ïa ka bha ka miat jong ka skul, namar man la u snem ki ju kynduh kajuh ka jingeh tang shu poi ka por lyiur bad lada ther u lapbah ka la wan beit ka jingshlei um kaba la pynjot lut ïa ka skul bad baroh ki jingdon jingem hapoh katei ka skul bad wat sha ka jaka mane blei bad ka ïingsah jongki.
U la ïathuh ruh ha ka jingshisha kum ki bor pynïaid skul ki la dep ruh ban ai jingthoh sha ka bor synshar district bad ruh sha ka ophis u Block Development Officer ka Umling C&RD Block ba kin shim khia halor kane ka bynta bad la don ruh ki bor sorkar kiba la wan ban jurip na ka ophis u BDO, hynrei kane kam shym la seisoh ha kaba kim lah ban thaw ki lad ki lynti ban pynlait na ka jingshlei um ha kane ka skul.
U la ïathuh ruh ka daw kaba wan kane ka jingshlei um ka dei hi na ka daw ka jingbym biang ki Nala um ka surokbah National Highway-6 bad tang shu wan u lapbah ka um kam don jak aba tuid sha Assam bad ka wan rah pynban ïa ka jingshlei kaba la tap wat ïa ka skul pule, ka jaka sah jongki bad ruh ka ïingmane.
Kane ka jingshlei um ka la wan rah ka jingduhnong kaba khraw ïa ki khynnah skul bad ki bor pynïaid skul ha kaba man la ka snem ki khynah skul ki shah ktah ha ka liang ka pule ka puthi bad khamtam ki bor pynïaid skul ki duhnong namar ka jingshlei um ka la pynjot lut ïa ki tiar ki tar bad baroh ki jingdon jingeh ha katei ka skul ba kum ki bor sorkar ki hap ban pyrkhat khnang ïa kane ka jingeh ka skul da kaba shna bha ïa ki nala um ban lait na kane ka jingshlei um, la bynrap utei u Brother kum u Principal katei ka skul pule.
