Bun ngut kiba ïoh thep hat-trick ha ka lympung MSL mynta ka sngi, mar 8-0 kol jop ka Nongkseh SSCC bad Langsning FC

Shillong, Ïaiong 28 : Ki la don haduh lai ngut ki rangïalehkai ha ka jingïakhun jong ka Meghalaya State League ha kane ka sngi Ba-ar kiba la ïoh ban thep hat-trick. Kine ki kynthup ïa u Nelson Rymbai ka Langsning uba la ïoh ban thep haduh saw kol, nangta u Chesterpaul ka Nongkseh uba ïoh thep lai kol bad u Rio Marboh ka Lumphyrnai Sohphoh FC uba la ïoh ban thep lang saw kol.
Haba phai pat sha kine ki jingïakhun, ka Nongkseh SSCC bad kumjuh ka Langsning FC ki la ïoh thep haduh 8-0 kol ïa ka kynhun liang pyrshah. Ka Nongkseh ka la ïoh ban pynliem suk ïa ka Mawshun ha ka jingïakhun kaba long ha madan SSA. Nalor ki lai kol na u Chesterpaul uba ïoh ban thep ha ka minit kaba 16, 35 bad 88 (P), ar tylli ki kol la ïoh ban thep da u Hardy Cliff Nongbri ha ka minit kaba 11 bad 90+2 bud pat sa ar tylli na u Shano Tariang ha ka minit kaba 52 bad 90 jong ka kylla miet. Ka kol kaba khatduh na u Fullmoon Mukhim ha ka minit kaba 90+4 ka la pyntikna ïa ka jingjop kaba don burom na bynta ka Nongkseh ha kane ka janmiet.
Haba phai pat sha ka Langsning kaba ïoh ban thep lang 8-0 kol ïa ka Umlakro, nalor ki saw kol ba thep da u Nelson (32′, 62′, 88′, 90’+1) ïa kiwei pat ki kol la ïoh ban thep da u Mebanlamlynti Masharing (29′), Samuel Phawa (56′) Morningstar Khongkiang (79′) bad kawei pat ka kol ha ka minit kaba 73 dei kaba la kum thep hi kaba pynlong ïa ka kynhun ban jop suk ha kane ka sngi.
Ha kawei pat ka jingïakhun ka Mawlai SC kaba dei ka lahduh ha ka snem ba la dep ka la mad ïa ka nam ïakhaid kaba mar 2-2 kol bad ka Laskein SC ha ka Group E ha ka jingïakhun kaba long ha Amlarem mynta ka sngi.
Lah ban kdew hangne ba mar shiteng na ki rangïalehkai jong ka Mawlai mynta ki don ha Manipur ban shim bynta ha ka I-League 3 ha kaba ki mihkhmat ïa ka Meghalaya. Kumta ha ka jingïakhun hynne ka sngi bun na na ki, ki dei ki rangïalehkai kiba dang khie. Wat hadien ba ki la shah lamkhmat shwa lyngba tang ha ka minit kaba 9 jong ka kylla step lyngba ka kol na u Bundaki Lamare hynrei u Jestibor Mawlong ha ka minit kaba 32 u la ïoh ban pynïakhaid.
Hynrei dei ynda la poi ka kylla miet ba u Syndongmiki Lyngdoh u la ïoh ban pynkhih jar ha ka minit kaba 55 ban pynlong ïa ka Mawlai ban ïoh lamkhmat kylla. Tangba kane kam shym la neh slem namar tang ha ka minit kaba 60 ei ei ka Laskein ka la ïoh ban pynphai kylla lyngba u Rithrangmiki Biam bad kane ka neh tad haduh ban da kut ka por ïalehkai.
Kawei pat ka jingïakhun kaba jop bun kol ka dei ha Wahïajer ha ka Group E ha kaba ka Lumphyrnai Sohphoh FC ka la ïoh ban pyliem haduh 6-1 kol ïa ka Lamyrsiang SCC. Ïa kine ki kol la ïoh ban thep da u Rio Marboh (9′, 45’+3, 72′, 79′) bad ïa kiwei pat ki kol la ïoh ban thep da u Phrangsngi Law (81) bad na u Chandame Suna (90+3). Ïa ka shi kol na ka bynta ka Lamyrsiang pat la ïoh ban thep da u Seiborki Kharlukhi.
Ha kane ka sngi la sakhi ruh ïa ki saw tylli ki jingïakhun kiba ki kynhun ki jop da ka said hapdeng ka jingïapyni bor kaba itynnad bha. Ha madan MFA Shillong ha ka Group B ka Mawphu SC ka la ïoh ban jop da 3-2 kol ïa ka Mulang SC Nongbah. Ha ka jingïakhun dei u Woldrick Susngi uba ïoh ban lamkhmat ïa ka Mulang tang ha ka minit kaba 10 hynrei dei ha ka minit kaba 28 ba u Arikdon L War u la ïoh ban pynphai noh. Haba poi pat ka kylla miet ka Mawphu ka la ïoh sa shi kol lyngba ka penalty kaba la pyndep da u Larikupar Nongkynrih ha ka minit kaba 64. Hadien kane u Banman Roy Nongsiej u la ïoh ban thep biang sa shi kol na bynta ka kynhun ha ka minit kaba 83 kaba la ai jingkyrmen ïa ka kynhun ban khur suk ai ka jingjop. Tangba ha ka por kaba ym poi pyrkhat u Dashwakini Suting u la ïoh ban pynphai biang sa shi kol na bynta ka Mulang ha ka minit kaba 90 kaba pynlong ïa ka jingïakhun ban neh da 3-2 kol. Tangba tad haduh ban da kut ka por ïalehkai ka Mulang kam shym la ïoh thep kol shuh bad kane ka pynlong ïa ka ban mad ïa ka jingshah rem kaba saw ha kane ka lympung.
Ha Khliehriat pat ha ka jingïakhun ha ka Group D la sakhi ïa ka jingïakhun hapdeng ka Rymbai Shkenshynriah SC kaba la ïoh ban pynliem noh ïa ka Ladthalboh da 2-1 kol kata ruh hadien ba ka shah thep kol nyngkong.
Dei u Pyniaidskhem Sylliang uba la ïoh ban thep ïa ka kol kaba nyngkong na ka bynta ka Ladthalboh ha ka minit kaba 31. Hynrei ka kol lyngba u Hesmiki Rymbai ha ka minit kaba 67(P) bad ha ka 90+2 ka la pynlong ïa ka Rymbai ban khur ïa ka jingjop ha kane ka sngi.
Ha ka jingïakhun ha Williamnagar pat la sakhi ïa ka Maram FC ba kan ïoh pynkut ïa ka nam rem kaba ar sien da kaba ïoh ban pynliem ïa ka A’chik SCO Rongjeng da 3-2 kol ha ka Group G. Ïa kine ki kol la ïoh ban thep da u Tremarchwal Ch Marak (2′), Bris Taro (43′) bad ruh na u Santosh Teron (55′). Katba u Keri G Momin (45′, 49′) u la long u nongthep kol na ka bynta ka ASCOR ha kane ka sngi.
Katba ha ka jingïakhun ha ka Group H, la sakhi ïa ka jingïakhaid kaba lai ha ki saw tylli ki jingïakhun ha kaba ka Seng Samla Umdang Pyllun ka la mad ïa ka jingïakhaid kaba mar 1-1 kol bad ka Mawten SC finishing ha Mawkyrwat. U Rangkynsaistar Mawsor, u la ïoh ban pynkhih jar na bynta ka Umdang ha ka minit kaba 36 katba u Oversharp Ïawphniaw u la ïoh ban pynïakhaid noh ha ka minit kaba 75 jong ka kylla step.
Ka jingïakhun ha kane ka sngi Balang pat kan don tang kawei ha ka Group G ha kaba ka Attong Matgrik FC kan aireng pyrshah ïa ka Janepih YSCA ha ka por 3:00 baje janmiet ha Williamnagar.