Asian Games 2026: Jop lut ka India ïa ki takma ksiar ha ka ïakop siat khnam ki kynhun

AICHI, Nailur 30: Ka India ka la jop ïa baroh lai tylli ki takma ksiar ha ka jingïakop siat khnam jong ki kynhun (compound archery team event) ha ka Asian Games 2026 hynne ka sngi Balang, ha kaba ka Chikitha Taniparthi bad u Sahil Jadhav ruh ki la ïoh ïa ka bhah ban ïashim bynta ha ka LA 2028 Olympics.
Ka Chikitha bad u Sahil ki la pynliem noh ïa ka kynhun shijur jong ka Republic of Korea, ka Park Jungyoon bad u Choi Yonghee ha ka shoot-off hadien ba ka jingïakhun takma ksiar ka la ïakhaid mar 157-157.
Baroh arngut ki nong India ki la kamai 10 point ha ka shoot-off, katba ka Park Jungyoon ka la sdang da kaba kamai 10 shuwa ba u Choi Yonghee un kamai 9 katba ka India ka la khur syndon ïa ka jingjop da 20-19 ha kane ka jingïakhun kaba la long ha Okazaki Chuo Sogo Park Multipurpose Square ha Aichi.
Ka jingjop ka la pynthikna ïa ka bhah jong ka India ban ïoh ïashim bynta ha ka jingïakop siat khnam ba mar shijur (compound mixed team archery) ha LA 2028.
Kane ka jingjop ka dei ka takma ksiar kaba ar jong ka Chikitha ha kane ka sngi hadien ba ka la ïasoh lang ryngkat ka Jyothi Surekha Vennam bad ka Prithika Pradeep ban ïada ïa ka takma ksiar ha ka Women’s Compound Team event.
Kine ki lai ngut ki nong India ki la pynliem noh ïa ka People’s Republic of China da 238-234 ha ka phainal, kaba ïaryngkat ïa ka world record da 24 tylli ki khnam ha ka jingïakhun jong ka women’s compound team.
Ka Jyothi bad ka Prithika ki la long kiba khlem jingduna ha ka phainal, da kaba kamai 10 ha baroh 8 tylli ki khnam ba ki la pyrshang, katba ka India ka la pyndep duna tang ar point na ka 240 point kaba lah ban kamai.
Kane kadei ruh ka takma ksiar kaba saw jong ka Jyothi Surekha ha ka Asian Games. Ka la jop ïa ka nam lahduh ha ka Women’s Individual, Women’s Team bad Mixed Team ha Hangzhou ha u snem 2023.
Ka India ka la pynkut ïa ka sngi da kaba jop lut ïa ki jingïakhun jong ki kynhun, ha kaba u Sahil, u Ganesh Mani Ratnam Thirumuru bad u Kushal Dalal ki la pynliem ïa ka China da 238-237 ha ka phainal jong ki shynrang.
U Sahil u la long uba khlem jingduna ha baroh kawei ka final, da kaba kamai 10 point ha kawei pa kawei na ki 8 tylli ki khnam ba u la pyrshang. Ka China ka la lamkhmat da 179-178 hynrei ka India ka la lah ban kamai 10 point ha baroh 6 sien lynter ki jingpyrshang ban knieh ïa ka nam lahduh da tang kawei ka poiñ.
Kane ka jingjop ka la ai ïa baroh arngut ka Chikitha bad u Sahil ar tylli ki takma ksiar ha ka shi sngi bad ka mut ba ka India ka la lah ban ïada ïa lai tylli na ki san tylli ki nam lahduh ha ka jingïalehkai compound archery ba ka la jop ha Hangzhou 2023. ïa ki takma shimet jong ki shynrang bad kynthei yn sa rai hadien.
Mynta ka India ka wan ha ka kyrdan ba 8 ha ka miej jingkheiñ da kaba khur 60 tylli ki takma: ba kynthup ïa 10 tylli ki ksiar, 21 tylli ki rupa bad 29 tylli ki rnong.