Shillong, Nailur 30: Ka Rangdajied United ka la pynthikna ïa ka jaka jong ka ban ïashim bynta ha ka Shillong Premier League ha u snem ban wan da kaba pynliem noh ïa ka Mylliem da 3-1 kol ha ka jingïakhun hynne ka sngi Balang ha SSA Stadium.
Ha kajuh ka por, kane ka resol kamut ruh ba ka Mylliem kaba la shah rem hynñiew sien na ki 8 tylli ki jingïalehkai ha kane ka samoi kan shah sloit noh sha ka First Division ha u snem 2027.
Ka Rangdajied ka la pynkhihjar lyngba u Mebannangkiew Thabah (39’), u Pasborlang Khonglikong (84’) bad u Franky Dkhar (90’+2), katba u Shaibor Nongrum (71’) u la thep ïa ka shi kol jong ka Mylliem.
Kane ka jingjop ym tang ba ka la pyllait ïa ka Rangdajied na ka jingma ban hiar kyrdan hynrei ka la kyntiew ruh ïa ka kynhun sha ka kyrdan ba san na ka kyrdan ba phra ha ka miej kamai point. Mynta ka RUFC ka la ïoh ban kamai 10 poiñ, ka ïakhaid bad ka Meghalaya Police hynrei da ka jingïapher kol kaba kham bun (da 0 la -2). Katba ka Mylliem ka dang sah sha trai duh jong ka miej da tang kawei ka point (1) bad kan ïaineh hajuh wat lada ka jop ïa ka jingïakhun kaba khatduh kaba dang sah.
Haba phai sha ka jingïalehkai, u Mebannangkiew u la duh ïa ka kabu ksiar ban pynkhihjar ha ka minit kaba 28 hynrei um shym la pynsepei pat ïa ka lad ynda u la ïohbiang hadien 10 minit, ha kaba ka RUFC ka la jam sha ka por shongthait da kaba lamkhmat 1-0.
Ka Mylliem ka la pynkhihwin ïa ka jingïakhun da kaba pynïakhaid ha ka minit kaba 71 lyngba u Shaibor, uba la pyrshang da ka bicycle kick ban pynkhihjar.
Kane ka la ai jingkyrmen ïa ka Mylliem ban wanphai biang sha ka jingïakhun bad ha kajuh ka por ka la nang pynkhlaiñ ïa ka Rangdajied, namar ka jingïakhaid kan ym pynthikna ïa ka jaka jong ki ha ka samoi ban wan.
Khatduh ka Rangdajied ka la ïoh ban lamkhmat biang ïa ka jingïalehkai hadien ba u Pasbor u la pynïakynduh tiak da ka khlieh ïa ka bol pashat jong u Franky. Ka jingïakhun ka la kut da ka penalty ha ka minit pynjlan, ha kaba u Franky u la thep ban pynskhem ïa ka jingjop jong ka Rangdajied.
Mynta ka sngi ka jingïakhun kan long kaba itynnad bha, ha kaba ka Langsning kaba ïada ïa ka nam lahduh bad kaba lamkhmat ïa ka SPL 2026, kan khreh ban aireng pyrshah ïa ka Shillong Lajong kaba wan kyrdan ba lai. Kane ka jingïalehkai kan long ha ka por 5 baje janmiet. La khmihlynti ba kane ka jingïakhun ka lah ruh ban rai ïa ka lahduh jong ka SPL 2026.
