Dawa u CEM ba rim ban khmih bniah ïa ka jinglong jingman ka surok Shillong -Dawki

Shillong, Iaiong 27: U Chief Executve Member (CEM) ba rim ka KHADC bad MDC ka Voice of the People Party (VPP) u Bah Shemborlang Rynjah u la dawa ban don da ka jingkhmih bniah ne audit da ka kynhun laitluid ïa ka jingshngaiñ jong ka surok Shillong–Pynursla–Dawki, haba kdew ba ym duna ïa ka 10 ngut ki briew ki la duh noh ïa la ka mynsiem ha katei ka surok naduh u snem 2023 namar ka jingtwa khyndew, ka jinghap maw bad ka jingtorti ka rukom pyntrei.
Ha ka shithi sha u Myntri Sorkar Pdeng ba khmih ïa ka tnat Road Transport and Highways u Nitin Gadkari, u Bah Shemborlang u la ong ba ki kam pynheh ïa ka surok kiba dang ïaid shakhmat ki la wanrah ïa ka jingkiew ki jingjia aksiden kaba ka wanrah ïa ka jingiap briew bad kane ka pyni ïa ka jingbymlah ban pynthikna ïa ka jingshngaiñ jong ka surok ha ka por pyntrei.
“Dei ban hukum ban don da ka jingpeit bniah da ka kynhun laitluid ïa ka jingshngaiñ haba pyntrei ïa ka surok ha baroh kawei ka bynta jong ka Shillong–Pynursla–Dawki,” u la kyntu ha ka shithi haba pynpaw ba kane kan dei ka sienjam ba nyngkong na ka Ministry ban wanrah jingshngaiñ haba pyntrei ïa ka surok.
U Bah Shemborlang uba mihkhmat ïa ka Lyngkyrdem–Laitkroh constituency hapoh ka Khasi Hills Autonomous District Council u la ong ba kane ka jingpeit bniah ka long kaba donkam ban bishar ïa ki jingma ha kylleng ka surok kaba pynïasoh ïa ka nongbah Shillong sha Dawki bad ki jaka jngohkai pyrthei kum ka Shnongpdeng bad Mawlynnong.
U la kdew ruh ïa ki jingma kiba ju jia na ka por shaka por ha shilynter jong ka surok Shillong-Dawki.“Ki khubor ba dang shen ki pynpaw ïa ki jingeh kiba mih namar ka jingpyntrei ïa ka surok Shillong-Dawki, kynthup ïa ka jingïap jong arngut ki briew hadien ka jingtwa khyndew bad khyllem ki maw kiba la ban ïa ka kali” ula ong.
“Kaba kham kongsan ka long ba naduh u snem 2023 haduh mynta, ym duna 10 ngut ki mynsiem briew ki la duh ha ki jingjia aksiden ha kane ka bynta namar ka jingtwa khyndew bad hap ki maw” ula bynrap.
“Kine ki jingjia kiba ju jia man ka por ki kdew sha ka jingbym lah ban pynthikna ïa ka jingshngaiñ haba pyntrei ïa ka surok, ha kaba pynkheiñ ïa ki kyndon Motor Vehicles Act, 1988 (as amended), Indian Road Congress (IRC) bad ki jingbthah ba la buh halor ka jingshngaiñ ha ki jaka trei,”la ong ka shithi.
U la pynpaw ïa ka jingbym don ki jingthoh jingmaham, ki Reflector bad ki jingïada na ka jingjia aksiden ha ki jaka ba don jingma, ka jingpyntrei torti, ka jingtih maw khlem da bud ïa ki kyndon kaba buh jingma ïa ka leit ka wan.