Bun kiba ïoh jingkoit jingkhiah lyngba ki Dawai phlang u Dr. H. Carehome Pakynteiñ
Jowai, Lber 14: U Dr. H. Carehome Pakynteiñ (DTM, DMHS) u long uwei na ki Kabiraij ne u Nongai Dawai Khasi-Pnar (Traditional Healing Services) uba pawkhmat ha Ri-Lum Jaiñtia. La kha ïa u haka 25 tarik Nohprah (December) 1962, ha Dulong Jowai, kawei na ki Dong ne ka shnong hapoh ka Sor Jowai. U dei u khun jong ka Kong Helina Pakyntein bad Woh (Late) Kendro War Passah.
Ki kmie ki kpa kiba ñiewkor ïa ka jingnang jingstad bad la phah skul ïa u naduh dangrit dang kumba 4 snem shiteng ha Lower Primary School Dulong. Hadien ba ula pyndep ïa ka jingpule Primary (Class III) ha Dulong la phah skul ïa u ha Marianhill Secondary School bad hadien ba ula passed Matric na Marian Hill, ula sangeh noh ban bteng ïa ka jingpule kaba kham shalor.
Ki Ma, ki Woh jong u ruh ki long ki long ki Nongai dawai Kabiraij hapoh ka dong ka shnat, u ma Care Home Pakynteiñ jait ba un long hi u Nongai dawai Kabiraij, u ju peitbniah bha ïa ka rukom ai dawai jong ki Ma ki Woh jong u bad u kwah ba ma u ruh shisien ka sngi un long u Nongai dawai Kabiraij ban ïarap ïa ki parabriew ba kin ïoh ïa ka jingkoit jingkhiah na ki jingpang bapher bapher, hynrei pat ka long ka jingeh ïa u ba kumno un lah ban long u Kabiraij.
Katba u dang pyrkhat kumno un long u Nongai Dawai ban ïarap ïala ki parabriew ba kin ïoh ïa ka jingkoit jingkhiah na ki jingpang bapher bapher haba um tip ïa ki Jaitphlang Dawai?. Jia ryngkhat katba u dangpyrkhat ula ïoh ïa ka jingpang ka baphylla bad ki kmie ki kpa kila pyrshang ban wad dawai na ki jaka sumar (Hospital) hynrei lehnohei ki dawai kim shym la ïadei bad ka jingpang jong u.
U ma Carehome ula ïathuh hapdeng kata ka jingpang ula phohsniew kawei ka jingphohsniew ka baphylla bad lyngba kata ka jingphohsniew la bthah ïa u ban wad ïa kum kita ki jaitphlang ki ban ïarap ïa ki briew ba kin ïoh ïa ka jingkoit jingkhiah bad la ong hadien kane ka jingphohsniew haba u kyndit na kaba ïohthiah ka jingpang jingshitom na ka met jong u ruh ka la shu koit la ka koit hi.
Haba ula koit na kata ka jingpang ula pyrshang ban wad ïa ki Phlangdawai kumba la bthah ïa u ha ka jingphohsniew. U la leit wad ïa kita ki jaitphlang kumba la bthah ïa u ha ka jingphohsniew bad haba u la ïoh ïa kita ki jaitphlang u la sdang ban ai dawai, ha kaba nyngkong ïa ki bapang kiba nium kumne kumtai hapoh ka dong ka shnong bad haba ula ïohi ba kita ki jaitphlang dawai kiba u ai ka ïarap ïa ki briew ban ïoh ïa ka jingkoit jingkhiah, nangta u pyrkhat ba un plie da ka Dukan ai dawai.
Ha kaba sdang jong ka snem 1989, ula plie la ka Dukan ai Dawai ha Kynruhsaphlang, ha ka juh ka por ula sdang ruh ïa ka Herbal Health Care Centre ha Dulong Lumsawe Jowai ha ka snem 2015, hynrei na ki daw kiba um lah kiar kane ka Herbal Health Care Centre jong u ka la shukut kumto. Ïa kane ka jaka ai Dawai kaba u plie ha Kynruh Saphlang (Jowai) la pynkynriah mynta sha Madan Kniakhad, Stand Shangpung Iawmusiang Jowai, ha kaba ula ai kyrteng ka Pakyntein Indiginious Herbal Medicine & Research.
U Dr. H. Carehome Pakynteiñ u ong ba ha kane ka jaka ai jingsumar jong u, u sumar ïa ki jait jingpang bapher bapher, kata kum na ka jingpang Taro, Shwar, Bampong, Tijo (Tohjaw), Niangsohpet, Jyrhoh, Pangksuid( Kjut-khloo) bad kiwei de ki jait jingpang.
U Dr. Pakynteiñ um ju ai dawai thala thaleiñ kat ïa kiba pan, hynrei ha shwa ba un ai dawai ïano re ïano u da peit da khmih bniah lyngba ki dak ki shin kiba paw ha u Khaw, ha ki Sbai bad kiwei de ki rukum peit ban lap bad ban shem ïa ka daw jong ka jingpang bad kiba kumno ki jaitphlang dawai kiba u dei ban ai kaba ïadei bad kata ka jingpang.
U ma H. Carehome Pakynteiñ u la ïoh ïa ka nam Doctor ha ka snem 2010 da ka Indian Board of Alternative Medicines. U Dr. Pakynteiñ da ka jingkhot jong ki briew, ula leit sumar briew ruh shabar ri kum sha Nepal, Bangladesh bad kiwei de ki ri kiba marjan bad jong ka Ri India.
Halor kane ka kam ai dawai bad sumar briew jong u Dr. H. Carehome Pakynteiñ ula ïoh ruh ïa ki Award (Khusnam) bad ka jingithuh ïaki kam sumar bad ai dawai jong u kum naka Indian Board of Alternative Medicines Calcutta, Head Department of Library and Information Science NEHU, Traditional Healer’s meet in North East Region of India, National Institute of Pharmaceutical Education & Research Guwahati, Science & Technology Planning Department and Members Secretary BRBC, Meghalaya bad kiwei de ki certificate kiba u la wan ïa shim bynta ha ki jingïalang jong ki Herbal health treatment
Ha ki snem kiba kham mynshwa ka bai dawai ka tat, hynrei namar ba ka bai sngi jong ki Nongwad phlangdawai ka la rem kumta la ong ba u hap shim beit laispah tyngka shisong ka dawai ïa kano kano ka jait jingpang.