Tyrwa ka KHADC ban pynïaid ïa ka Khasi Traditional Medicine Institute, Lum Sohpetbneng

Shillong, Lber 14 : Ka Khasi Hills Autonomous District Council (KHADC) ka tyrwa mynta ban aiti pynïaid noh ïa ka hospital sumar tynrai ne ka Khasi Traditional Medicine Institute kaba don ha Lum Sohpetbneng, Ri Bhoi District.
“Ngi la khot da ka tender ba kito kiba kwah ban shimti pynïaid ïa ka Institute bad ban kyntiew ïa ka sumar tynrai,” ong u CEM ka KHADC, Bah Pynïaid Sing Syiem haba kren bad ki lad pathai khubor dang shen.
Katkum ka jingïathuh jong u, watla bun kim pat dei kiba la dep ïoh ïa ka jingithuh hynrei ki don pat haduh kumba 1200 ngut ki nongsumar khasi ne ki nongsumar ba pyndonkam da ki dawai kynbat na bynta ki jingpang bad jingshitom bapher bapher na ka Jaidbynriew Khasi.
“Ngi kwah ba kane ka Institute kan long kum ka Wellness Centre ha kaba ki paidbah ki lah ban wan shim dawai, wan shah sumar bad sah ruh. Na ka bynta kito ki bym kwah ban sah ki lah ban shu wa shim tang ki dawai kynbat,” u la bynrap shuh shuh.
Lah ban kdew hangne ïa katei ka hospital sumar tynrai la tei bad pynbit pynbiang ha ka jinglut kaba la kot sha ka 7 klur tyngka ha u Lum Sohpetbneng, Ri Bhoi District.
Ki tyllong khubor ki ïathuh ruh ba ka rukom treikam kan long thik kum ha kiwei ki hospital hynrei kaba ïapher ka long sa tang ha ki rukom sumar bad ki dawai.
La ïathuh ba ïa mynta hi kum ka jingsdang, kin pdiang shwa tang kumba 20 ngut ki nongpang bad hadien kane pat kin sa peit. Ha kane ka jaka sumar kan dei beit da ka jingsumar tynrai bad ki nongsumar lane ki doktor kidei kiba la tbit ha katei ka laiñ ai dawai bad sumar tynrai.