Shillong, 14 Lber: U Myntri Rangbah ka jylla u Conrad K Sangma, ha ka prokram kaba la long jong ka Meghalaya Grassroots Music Project (MGMP), Season 2, kaba la pynlong ha Marriot Shillong, u la pynkup burom bad ai ka jingithuh ïa ki riew donsap ha ka put ka tem kiba la palat ïa ka 15 snem. Ha ka prokram la donlang u nongshah khot sngewbha uba kyrpang u Aktor ne Bollywood star bad u briew uba ju iajan bad ki samla u John Abraham.
Haba kren ha kane ka jingpynkup burom u Myntri Rangbah u la pynkynmaw biang ïa ki khyllipmat ki por ba u dang sngewtynnad bad ïoh por bha ban pynlut ha ka put ka tem bad kito ki sngi jong ka jingshitrhem ki la sahduh hapoh ki jingmut jingpyrkhat bad kiba la ktah bha ïa ka jingim jong u.
“Manla ka por ba nga pyrkhat ban ban thaw ki lad ne ki rukom treikam nga pynïasoh biang sha kito kipor bad nga pyrshang ban kyntiew ïa ki samla ha ka rynsan, ban kyrshan bad kdew ïa kaei kaba ngi khlem da la ïoh sha ki por kiba mynshwa,” u la ong. U la bynrap ba ka MGMP ka la long kawei na ki prokram kaba pynhun namar ka jingïarap ka long ïa ki samla kiba donsap ha ki kam tem kam put.
U la ong ba ka put ka tem mynta ka la don ka jingïapher na ki snem kiba mynta namar ki kor ki bor jong ka juk mynta. “Nga kwah ba ki samla ba dang khie ban shim ïa ki lad jingïarap lyngba ki technology ba mynta bad ban kyntiew ïa ka put ka tem jong phi sha kawei pat ka kyrdan,” u la ong.
“Ka MGMP nalor ba ka la pynioh ïa ki samla ka rynsan kan ïarap ruh ïa ki ba kin ïoh ïa ki jingshah hikai bad ki jingtip ban pule bad ban thoh ïa ki jingtem ba kin lah ban tem ha ki rynsan jong ki ri ka pyrthei,” ula ong. U la bynrap da kaba ong ba kane kan ai ka lad sha ka lynti jong ka jingjanai bad jingstad ha ka liang ka put ka tem.
U Myntri Rangbah u la pynpaw ïa ka jingmut ban ai ka jingkyrshan ïa ki nongtem da ka jingïarap pisa ba kin thied ïa ki tiar tem. “Kan sa don ka selection committee bad lyngba ka jingjied kaba biang ki nongtem kiba don hok kin lah ban ïoh ki lad jingïarap pisa,” u la bynrap.
Ha kane ka prokram na ka liang u Myntri Rangbah u la kular ban ai ka Ibanez guitar sha ki nongtem kiba don ka jingïapher ha ki dkhot met.
Na ka liang u John Abraham, u la ong ba kaei kaba ka sorkar jylla ka ai ka lad ban kyntiew sha ki rynsan ia ki riew ïalehkai bad ki nongtem ka long kaba la ktah bha ïa u. Haba kren sha ki riew donsap u la ong, “Ïaibteng ban im ha kane ka jingphoh sniew bad ka jingsngewthuh ba phi long kiba donbok ban ïoh kum kine ki lad jingïarap kiba ym ju kham ïoh ha ki jingim.”
Na ka liang u Myntri Rangbah bad kiwei kiba la shah khot sngewbha ki la pynkup burom ïa Tengnang Sangma, Gracyl Ropmay, Starly Shullai, Felix Langstieh, Cinda Sangma, Amabel Susgni bad Desmond Rimaki Sunn. La pynlait ruh ïa ka kot “The Songs of Our People,” ba la thoh da u Anurag Banerjee.
Ia ka MGMP Season 2 naduh ba la sdang ha ka 4 tarik u Risaw, 2023, ka la pynlong ïa ki 730 tylli ki prokram ha kylleng ka jylla ha kaba palat ïa ka 1000 ngut ki nongtem kiba la ïashim bynta.
Ka jingïoh kaba long pdeng jong ki nongtem ne kiba thoh jingrwai ka la kiew na ka T. 10,000 sha ka T. 12,000 ha ka Season 2.
