Wat shah rong ha ka erïong ne umsaw kiba ju wan ban pynthame ïa ki paidbah por elekshon: President UDP

Shillong, Jylliew 07: Ka United Democratic Party (UDP) ha ka sngi Saitjain ka la sdang ïa ka jingpynithuh paidbah ïa u kyrtong jong ka party na bynta ka elekshon MP shiteng samoi, Bah Vivanstone G Kharngapkynta na Mairang constituency, kaba dei ka constituency jong u President Rangbah ka Party, Bah Metbah Lyngdoh.
Ha kane ka jingïalang kaba la lum tang na ka bynta ki nongïalam ba hakhmat jong ka party na ki unit bad ki tnad bapher bapher jong ka Mairang constituency, la donlang ruh General Secretary ka Party Bah Titos W Chyne, nangta u MLA ka Mawphlang Bah MB Kurbah, MDC ka thain Bah Equator Nongrang, kynthup lang ïa ki bahaiing ha sem jong u kyrtong kiba la wan ban synran lang nalor ki nongkitkam jong ka UDP Eastern West Khasi Hills bad ruh ki MLA bad MDC barim.
Na ka liang u President ka Party, Bah Metbah Lyngdoh haba kren ha ka jingïalang u la ong ba lada phai dien ïa ka elekshon MP ha u snem 2024 ka jingkyrshan kaba ki ïoh ka long kaba duh mynsiem bha bad kam don jingkyrmen. “Hynrei ynda la poi pat ka elekshon MDC ha u 2025 ka jingïoh vote jong ka party ka la kiew biang haduh saw shah,” u la ong.
U la ïathuh ruh ba hapdeng ka jingduh mynsiem ha ka elekshon MP hynrei ynda la poi ka elekshon MDC pat ki la jop pynban haduh san ngut na KHADC bad lai ngut na JHADC nalor ba ki don bun ngut ki kyrtong kiba la jan poi sha ka thong.
Shuh shuh u la ïathuh ruh ba ka la don ka jingpynbor ban ym dei kyrtong ha kane ka elekshon shiteng samoi hynrei bun ki nongïalam na kylleng ka rilum Khasi-Jaintia ki kwah ba dei beit ban ïakhun.
“Ki don kiba kwah ban ym sei kyrtong ha kane ka elekshon bad don pat kiba ai jingmut ban shu leit kyrshan noh ïano ïano,” u la ong da kaba bynrap baddei hadien ba ki la ïoh pdiang ïa ki jingai jingmut na kylleng ka Rilum Khasi-Jaintia kiba la ai jingmut ba dei beit ban pynieng kyrtong.
Haba bynrap lang u General Secretary ka party ba dei ruh u nongïalam ka liang pyrshah ha KHADC u la ong ba kane ka jingïalang ka long ban pynithuh ïa u kyrtong na ka bynta ki paidbah ka thain kin ïohi markhmat khnang ba kin ai ka jingkyrshan kaba pura ha ka elekshon MP shiteng samoi kaban sa long shen.
“Kum ka party hadien ba dep rai ïa u kyrtong ka thong ka long ban pynithuh ïa u kyrtong na la iing shwa. Ka jingthrang jongngi ka long ban ym leit pynithuh ha ïew ha hat, ha rud nong ne ha lynti syngkien.Hynrei ban leit pynithuh beit markhmat ki paidbah,” u la ong.
Shuh shuh u ong ba ka jingwan jong ki ban pynithuh nyngkong na constituency jong u President rangbah ka long ban ai mynsiem lang ïa ki MLA, MDC kiba dei na ka distrik bad khamtam eh ïa ki nongtrei party baroh.
Haba kren shaphang u kyrtong, u la ong ba ha ki lai snem ba u bat kum u CEM ha KHADC, u la lap ba Bah Vivan kum u Standing Counsel um pat ju shah rem kawei ruh ka mukotduma jong ka council. “Haba ïa tyngkhuh bad ki ain bapher bapher ba ngi mynjur ha Iing Dorbar kiba ktah ïa ka Ri bad ka Jaidbynriew u dei u briew uba hakhmat eh ban kren ïa kine,” u la ong.
Katba na ka liang u kyrtong pat ha ka jingkren u la ïathuh ïa ka jingïaid lynti jong u kum u nongïalam ka seng ki samla pule bad ter ter haduh ba un dapoi sha ka kam kum u nongïasaid ain bad u muktiar uba la don bynta wat ban ïarap ïa bun ki shnong bad ki longiing kiba kynduh jingeh khlem da ohdor ne shim pisa ruh.
U la ong ruh ba kum u muktiar ba trei na ka bynta ki paidbah um ju pyrkhat satia ïa ka pisa namar u sngewthuh ba u don ïa ka bynta kaba khraw ban ïarap lang ia kiwei pat kiba donkam ka jingïarap jong ki ban ïoh ïa ka hok.
“Hapoh ka kynhun jongnga haduh mynta ki don 15-20 ngut ki nongïasaid bad ki long kiba kloi ban ïarap ïano ïano haba ki kynduh ki jingeh kiba ïadei bad ki kam ain,” u la ong.
Da kaba pynithuh ïalade kum u Nongïasaid uba dukhi tam, u Bah Vivan u la ong ba lada u shah jied ban long kum u MP sha Lok Sabha un dei u nongmihkhmat uban ym salia wat ban ieng marwei ban ïakren na ka bynta ka ri bad ka jaidbynriew.