Shillong, Lber 14 : Ban pynsuk ïa ki samla kiba pynkhreh ïa ka eksam kam Staff Selection Commission, ka Tribal Design Forum bad ka IEQ Foundation ki la snohkti lang ban tyrwa haduh 1000 tylli ki scholarship sha ki samla ba kwah ïakhun ïa katei ka eksam kam na ki jaidbynriew riewlum jong ka Ri India (kumba la kdew ha ka thup ST jong ka sorkar India).
Ka Staff Selection Commission (SSC) kadei ka tnad jong ka sorkar pdeng kaba ju pynlmong ïa ki eksam ïa khun kam man u snem ban pyndap ïa ki kam ba lait ha ki Group B bad GroupC ha ki tnad bapher bapher jong ka sorkar pdeng.
Katkum ka kyrwoh la ong ba kane kadei kasien kaba ar ba la pynlong ïa ka TDF SSC Scholarship. La ïathuh ba ha ka sien kaba nynkgong ki samla riewlum na ki 16 tylli ki jylla bad na ki 25 tylli ki kynhun jaitbynriew riewlum ki la ïoh jingmyntoi na katei ka scholarship.
Ka TDF kaba peit na ka bynta ka bha ka miat jong ki riewlum ryngkat bad ka IEQ kin ïarap ïa kitei ki samla ban ïoh ïa ka IPYQ, kaba dei ka mobile app kaba lah ban pynsuk ïa ki samla ba kin sngap ïa ki jingbatai, nangta ban phah print bad pynkhreh ïa ka eksam da kaba peit nuksa na ka eksam jong u snem ba la dep ha ka rukom kaba suk bha. La ong ruh ba kane ka app ka pynsuk wat ïa kito ki samla kiba don jingthut ha ki dkhot met.
Ki samla kiba kwah ban ïakhun ïa ka SSC na ki jaidbynriew ki lah ban aplai ïa kane ka scholarship haduh ka 07tarik Ïaiong, 2024 lyngba ka www.tribaldesignforum.com. Ïa ki jingtip kiba kham bniah halor kitei ki scholarship lah ruh ban ïoh ha ka ktien Hindi bad English ha ka www.tribaldesignforum.com.
Man u snem ki don haduh 30 lak ngut ki kyrtong kiba aplai ïa ka SSC bad kumba 15 lak ngut ki ju mih ban ïakhun ïa ka. Ha u snem 2022 ki la don haduh 33,55,194 ngut kiba rejistar ha ka SSC CGL.
