Nongpoh, Nailar 05: Namar ka jingeh jong ki paidbah kiba hap ban shong dum naka por shaka por naka jingbym biang ka bording elektrik kiba la ud ruh sha ki nongïalam seng, ka Hynniewtrep Youth Council (HYC) haka sngi Palei kala leit ban kynduh syndon ïa u CEO ka MePDCL Umiam ban pynsngew ïaka jingeh jong ki paidbah bad ban kyrpad sha ka tnad ba ka dei ban pynbiang mar dor ïaka bording sha kiba bun ki shnong ha ka thaiñ Raid Nongtung.
Ka seng hapoh ka jingïalam jong u Samla Hercules Suting bad u samla Pynshai Rymbai lem bad ki dkhot kila leit ruh ban kynduh ïa u CEO ka tnad MePDCL naka bynta ban ioh jingshai halor ka jinglip khah khah jong ka bording sha kitei ki thaiñ kaba la buh ïaki paidbah hapdeng ka jingeh kaba khraw ban pyndep ïaki kam ki jam bad kiwei kiwei ki jingdonkam naduh ki samla pule.
Ka seng kala pynpaw ruh ba kane ka jingeh kaba ki paidbah ki ïakynduh sha katei ka thaiñ kam dei shuh ka sien kaba nyngkong, hynrei ki paidbah naka por shaka por ki ju mad jingeh ha kaba ïadei bad ka jingthud ka bording, kaba la ktah ïaki samla pule kiba kamai kamjih da kaba pyndonkam da ka bording, ki dukan bad kiwei kiwei.
Ha katei ka jingleit kynduh jong ka seng naka liang utei u ophisar u la kular ban shimkhia ïa katei ka kam bad ka jingeh jong ki paidbah bad hakajuh ka por naka liang ka seng kala dawa ruh ba dei ban thung ïa u lineman ban peit sha kitei ki thaiñ ban peit ïaka jingeh bad ka jingthud ka bording.