Shillong, Naiwieng 28 : U Chief Executive Member (CEM) barim ka JHADC, Bah Madonbai Rymbai ha ka sngi Ba-ar u la buh jingkylli ïa ka jingpyrshang jong ka Jaintia Hills Autonomous District Council bad ka Khasi Hills Autonomous District Council ban phah pynjlan ïa ka samoi treikam jong ka Iing khlem kino kino ki nongrim kiba biang.
Ym tang katta, u la kynthoh ruh ba ka jingtyrwa ban pynbeit thymmai ïa ki constituency ha ki ar tylli ki ADC kadei ka jingpyrshang ban ïalam bakla ïa ki paidbah ka rilum Khasi bad Jaintia, na ka liang u Bah Madonbai u la buh jingkylli ruh ba imat kito kiba don ha ka bor imat ki kwah ban pynlong kam shimet noh ïa kitei ki ar tylli ki district council ha ka jylla.
“Kane ka jingtyrwa pynjlan ïa ka samoi treikam jong ki ar tylli ki ADC nga ïohi ba kam don nongrim namar kam don satia kano kano ka daw kaba shongnia ban pynjlan ïa ka samoi treikam kaba san snem sha ka samoi treikam kaba 6-7 snem. Kane nga ong ba donkam ban ïoh shwa ïa ka jingmynjur na ka sorkar pdeng bad ka Lok Sabha,” u la ong.
Nalorkata, u ong ruh ba baroh ki dei ban long katkum ki kyndon khnang ba ki paidbah kin ym shah ïalam bakla ha kito kiba ïalam ia kitei ki ar tylli ki council.
Da kaba pynpaw ba um pyrshah ïano ïano ruh, u Bah Madonbai u la ong ba um kwah ban kynthoh shimet ïa kino kino ki politishan hynrei u kren kyllum ba ka Riti Synshar ka kren shai ba kam don nongrim satia kaba shah ïa uwei u briew ban thoh sha u Lat ba kwah ban rah ïa kum kitei ki jingtyrwa ha ka Iing.
Shuh shuh u la ong ruh ba lada phai sha ka JHADC, katei ka jingpynbeit thymmai ïa ki constituency kala don lypa la 10 snem mynshwa.
“Mynta pat kumno hadien ar bad lai samoi ba phin kwah ban leh biang ïa ka jingpynthymmai. Kane ka paw ba phi pyrshang ban pynkylla ïa ki ADC sha ki Corporation ha kaba kin lah ban pynlong mar shimet,” u la bynrap biang.
